RAIBUS Sekyuriti Sevis Limited (RSSL) wanpela lokal papagraun kampani bilong ol risos papagraun bilong Ramu nikel projek long Madang provins long las wik Sarere i bin mekim wanpela spesel dedikesen long tripela nupela kar ol i kisim.

Dispela tripela nupela kar bai helpim RSSL long sait long transpot na lojistik wok taim em i bringim sekyuriti sevis i go long ol klaint bilong en long Madang provins.

Wanpela pastor bilong Asembli ov God (AOG) sios, Dick Dagen i bin mekim dedikesen wantaim prea long las wik Sarere moning na bihain long en i lukim Kopret Afes Jeneral menesa bilong Ramu NiCo Menesmen (MCC), Charlie Hu i kisim ki long han bilong CEO bilong Raibus Grup ov Kampani, Kenny Kerry na i givim i go long han bilong Jeneral Menesa bilong RSSL, Mathew Denguo.

Dispela tripela nupela kar em kost bilong ol i moa long K500,000 na tupela long ol Toyota lenkrusa bai lukim wanpela i go long wok lojistiks long Kurumbukari Main na arapela bai ol i salim i go wok long Basamuk Rifaineri.

Narapela kar bai ol i yusim long wok long Madang operesen bes i bilong RSSL.

Siaman bilong Raibus Grup ov Kampani, Steven Saud long toktok bilong em i givim luksave long ol sekyuriti gad bilong RSSL na tu menesmen na i salensim divelopa, Ramu NiCo (MCC) long givim ol moa wok bisnis long ol han kampani aninit long Raibus Limited.

Mista Hu long toktok bilong en i salensim RSSL na tu ol papagraun kampani aninit long Raibus Grup long mekim gut wok bilong ol na bringim kamap gutpela kwaliti sevis.

Mista Hu i tok amamas long kain lis wok-bung namel long Raibus Grup na RSSL na i askim olsem ol i mas wok bung wantaim na bringim gutpela kwaliti sevis na winim ol wok mak we i ken bringim gutpela helpim ol i go long ol sea-holda bilong kampani em ol papagraun long ples long Usino-Bundi na Raikos distrik long Madang provins.

Jeneral Menesa bilong RSSL, Mathew Denguo i tok tenkyu long RamuNiCo (MCC) na tu long Raibus Limited long baim na givim ol tripela kar aninit long lis we ol bai yusim na mekim mani na bekim bek long mama kampani.

Denguo i tok em i gat strongpela bilip olsem ol bai wok strong na wantaim ol arapela nupela klain tasol i gat olsem RD Tuna, HBS na Galeo Timbas, RSSL i ken bekim bek dinau insait long sotpela taim tasol na bai kamap olsem papa tru bilong dispela tripela nupela kar.

Deputi siaman bilong Raibus Limited, Moses Kumura i stori long histori bilong RSSL na tu Raibus Grup na i tokaut olsem Raibus Sekyuriti kampani i bin kirapim wok bilong en long Oktoba 25, 2007 na em i stap aninit long mama kampani em Raibus Limited Grup ov Kampanis.

Ol arapela han kampani long wankain taim long kamap em Raibus Propeti Limited, NCS-Raibus Catering na Raibus Enjiniaring Limited.

James G. Kila i raitim