Dia Edita, Sampela strit long Nesenel Kepital Distrik i bin stap isi long taim bilong amamasim Nu Yia bikos ol polisman na meri i bin mekim bikpela wok tru bilong lukautim lo na oda.

Long strit bilong mi ol yangpela i bin selebret gut tasol bihain sampela i bikhet na brukim botol nabaut long rot. Ol i brukim ol emti botol blueberry na ol arapela strongpela dring em ol i salim long liklik mani tasol. Long Mande mi lukim nius ripot olsem NCD polis bai mekim wok painim long hamas alkohol i stap insait long ol dispela strongpela dring. Ol polis i ken kisim tingting bilong komyuniti tu long pasin ol yangpela i save mekim long brukim ol dispela botol long rot na mekim ples i no seif long ol manmeri na ol kar tu.

Saul Taina Gordons NCD