Dia Edita, Mi amamas long lukim moa manmeri long NCD i wok long kisim COVID-19 sut. Planti bilong ol em ol yangpela manmeri.

Dispela em i gutpela mak bikos nau i gat nupela kain COVID-19 vairus ol i kolim Delta Variant. Dispela nupela vairus i strong moa na i save kalap hariap tru i go long ol manmeri na mekim ol i sik nogut tru. Dispela sik i kamapim bikpela hevi long Australia na long Indonesia na Wes Papua nau. Sapos yu no was gut, bai em i bagarapim tru PNG. Ol bratasusa long Fiji i wok long kisim taim nau bikos long Delta variant bilong COVID-19.

I gutpela long lukim ol sios lida na ol lidaman na meri i kamap ples klia na tokim ol manmeri long go kisim dispela banis sut.

Tasol i gat sampela sios lida i wok long egensim dispela veksin. Ol i wok long pretim na paulim tingting bilong ol manmeri long kain kain stori we ol saintis i soim pinis olsem i no tru.

Dispela veksin em i fri na em i laik bilong wan wan long go kisim. I no gat lo i fosim yu long kisim. Tasol sapos yu no kisim bai yu inap long sik nogut tru long taim yu kisim dispela Delta variant.

Skelim laip bilong yu na banisim famili bilong yu na ol arapela manmeri i stap klostu long yu. Go kisim COVID-19 veksin.

Sara Ivain

Tokarara

NCD