Dia edita,
Mi amamas long bikpela wok i kamap long stretim rot long 8 Mail i go long 14 Mail ausait
long NCD.

Mi amamas tu long lukim arere bilong rot i klia na i no gat ol rotsait maket lain i pasim spes
na mekim ples i luk nogut. I gutpela tu long ol i rausim ol setelmen arere long rot. Mi hop ol
dispela lain i muv i go wokim haus longwe long bikrot.
Tasol bikpela askim i stap olsem: Watpo na NCDC o husat lain i go pas long dispela plen i no
laik stretim ol fida rot i go olsem. Stretim baksait rot long ten-of bilong ATS na trefik i ken
bihain baksait rot long Malolo Estet na Glory Garden i go kamap gen long mein Sogeri rot?
Trefik i save ran isi isi nau na ol manmeri na skul studen i leit long wok na skul. Na long
apinun tu wankain pasin i kamap.
Plis yupela i stretim hariap baksait rot na helpim ol lain husat i save yusim dispela rot ausait
long siti. Narapela rot i go olsem long Bomana Polis Koles na bungim gen mausrot long Woa
Semeteri, i ken helpim trefik long ran hariap. Tasol dispela rot tu i nidim wok long stretim ol
bagarap i stap long en.
Penny Sina
14 Mile
NCD