Dia edita,

Yumi stap pinis nau long 2021 na i no gat senis long wei bilong baim skul fi.

Olgeta yia, taim skul i laik stat, ol papamama i save sanap long longpela lain tru ausait long ol benk long baim skul fi. 

Oloman! Wanem taim bai yumi yusim nupela teknoloji long baim skul fi na sotim lain ausait long benk.

Na ol skul tu i mas senisim pasin bilong rejistresen na enrolmen. Putim ol enrolmen fom long intanet na ol papamama i ken daunlod na pulimapim na salim i go bek. I luk olsem ol skul tu i stap yet long tudak. Ol i no yusim moden teknoloji long givimaut infomesen na mekim wok bilong ol i isi.

Las wik mi lukim ol studen i wok long kalap long PMV long go long sekenderi skul ausait long siti long kisim ol fom na mi sori tru long ol.

Mi laik salensim ol yangpela manmeri husat i skul long IT na i stap nating nau long lukluk long dispela na helpim ol skul. Na ol benk tu i mas painim nupela rot bilong helpim ol papamama long nupela wei bilong baim skul fi. Traim long ol kain ples olsem Mosbi na sapos i wok, orait skruim i go long ol arapela provins tu.

Rita Sambin

Gordons

NCD