Ol spots poto bilong dispela wik i gat hoki bilong ol meri NSL na volibol.

PASIM: Wanpela pilaia bilong Bismark i traim long pasim na rausim bal long birua bilong em bilong Wanderers long B Gred hoki resis bilong ol meri long Port Moresby Hockey Association (PMHA) long Sir John Guise stedium las wik Sarere, Oktoba 22. POTO: Andrew Molen/ Wantok.

PUDAUN: Nigel Dabinyaba bilong Gulf  Komara FC i kirap nogut na pudaun insait long maus bilong gol bilong ol Amoana FC bihain long em i salens wantaim goli bilong Amoana FC. Dispela paul pilai i lukim Dabinyaba i kisim fri kik long bringim skoa bilong tim bilong em i go level wantaim Amoana FC 1-1 long raun foa bilong NSL resis bilong ol long PNG Football Stadium long Mosbi las wik Sarere, Oktoba 22. POTO: Andrew Molen/ Wantok.

SALIM GO BEK: Libero bilong Raukele Dolphins i kisim wanpela bal we i kam long sait bilong ol long gren fainel gem bilong ol meri long Fairfax volibal resis long Gordon, NCD. Raukele i winim taitel bilong ol meri agensim Matala 3-0 las wik Sarere, Oktoba 22. POTO: Andrew Molen/ Wantok.

RAUSIM: Pilaia bilong Hekari no inap long abrusim beks bilong NCD Souths FC husat i rausim bal i go ausait long lain. Hekari i winim dispela gem 6-1 long raun foa bilong NSL resis bilong ol man long PNG Football Stadium long Mosbi las wik Sarere, Oktoba 22. POTO: Andrew Molen/ Wantok.

I GO ANTAP: Ol pilaia bilong Matala i redi long paitim bal i go hapsait long net long gren fainel gem bilong ol agensim Raukele Dolphins long resis bilong ol man insait long Fairfax volibal kompetisen long Gordon, NCD. Dolphins i Matala 3-2 las wik Sarere, Oktoba 22 long kisim taitel bilong ol man. POTO: Andrew Molen/ Wantok.

HETIM GO BAKSAIT: Ati Kepo bilong Hekari United FC (lep han) i wetim birua bilong em bilong NCD Souths FC i traim long hetim bal i go bek. Strongpela gem bilong Hekari i lukim ol i win 6-1 long raun foa bilong NSL resis bilong ol man long PNG Football Stadium long Mosbi las wik Sarere, Oktoba 22. POTO: Andrew Molen/ Wantok.

PAITAIM GO BAKSAIT: Wanpela pilaia bilong Bismark (lep han) i apim lek na paitim bal i go long baksait abrusim tupela birua bilong em bilong Wanderers. Ol i salens insait long B Gred hoki resis bilong ol meri long Port Moresby Hockey Association (PMHA) long Sir John Guise stedium las wik Sarere, Oktoba 22. POTO: Andrew Molen/ Wantok.