Man husat bai kisim Moana Pasifika i go insait long namba wan sisen bilong ol long Super Rugby it ok dispela tim i spesel na i no gat ol ausaitlain bai stiaim ol disisen bilong ol.

  Aaron Mauger husat i bin wanpela All-Black ragbi yunion pilaia bilong Nu Silan bipo, em i kosa bilong Moana Pasifika. Em i tok New Zealand Rugby Players’ Association, wantaim New Zealand Rugby i bin helpim ol Moana long kisim laisens bilong ol. “Mipela i laik statim gut dispela sisen na New Zealand Rugby Union i bin helpim mipela long winim dispela mak.  Olgeta samting i stap long han bilong mipela nau. Em i taim bilong mipela na mipela i gat sans long soim kala bilong mipela.” Mauger, em i hap Samoa, Cook Islands, na Tahiti, na em i tok Moana i redi long sanap long strong bilong ol yet.  “Mipela yet bai mekim olgeta disisen long husat bai stap long skwat, husat bai wok wantaim mipela, olsem wanem mipela bai sapotim Tonga na Samoa ragbi na olsem wanem mipela bai kirapim Moana Pasifika,” em i tokim Pacific Beat. Mauger i tok dispela wok bilong em olsem kosa bilong Moana em i bikpel salens tru long laip bilong em. Tasol em i tok dispela wok i mekim na em i kam bek gen long dispela gem. “Mi amamas bikos mi pilim olsem mi bihainim lekmak bilong ol tumbuna bilong mi na i bringim mi i go klostu long en. Em i wanpela wok tasol mi kisim long ragbi bikos mi bin bihainim narapela rot long las yia,” em i tok. “Em i pas tru long lewa bilong mi....mipela i laik kamap tim we ol manmeri bilong Pasifika bai i kam joinim long baihain taim. Olsem na sapos mipela i winim dispela mak, bai mipela i win. Ol dispela namba long skoabot bai i kamap, na driman bilong mipela em long stap long dispela mak wantaim ol arapela top tim.

Richard Ewart i raitim