PENRITH Panthers i bin winim South Sydney Rabbitohs 14-12 long 2021 NRL grand fainel long Brisbane Lang Park.

Pilaia bilong Panthers Stephen Crichton i kisim wanpela intasep trai long 67 minit long mekim bikpela difrens namel long gem, bihain tasol Rabbitohs i misim tupela sans long droim gem. Long las yia NRL 2020 sisen we ol Melbourne Storms i winim ol, ol Panthers i no westim taim long dispela yia gren fainel we ol i bin dominetim fil posisen na putim namba wan trai we Matt Burton i bin skorim long 17 minit bilong fes hap yet. Cody Walker bilong Rabbitohs i bekim strongpela salens bilong ol Panthers na mekim wanpela wanmen hatwok long putim wanpela trai. Tru ol i lusim sampela posesen na ol Penrith Panthers i kisim wanpela fil gol na lidim skoa poins long haptaim. Rabbitohs i levelim skoa poins wantaim wanpela fil gol long stat bilong seken hap. Dispela i no stopim ol Panthers long apim gem bilong ol na putim presa inap narapela 20 minits, dispela i mekim na Walker i tromoi pas we i go stret long han bilong Chricton we em i ran 40 mita long putim dispel a intasep trai. Ol Rabbitohs i stil igat taim long kam bek we ol i lukluk igo long winga bilong ol Alex Johnston long putim trai long kona insait long las sikis minits i stap long klok. Tasol presa bilong gem na taim i sot mekim na Adam Reynolds i misim konvesen long kona we i sapos long salim gem go insat long extra taim. Long pinisim gem Panthers i holim strong tupela poins tasol na winim gem we Nathan Cleary i winim  Cluve Churchill Medol bilong bekim bek lus bilong las yia.