Praim Minista i tok PNG i sanap wantaim King Charles long dispela taim we em i kisim toksave long ol dokta olsem em i gat kensa.

STRONGIM KING: King Charles i kisim toksave olse4m em igat sik kensa na Praim Minista Marape i salim tok sapot bilong kantri long em long dispela taim. POTO: US Weekly.

PRAIM Minista James Marape i salim tok long King Charles III olsem Papua Niugini i sanap baksait long em long taim em i kisim marasin bilong sik kensa.

Dispela sapot toktok bilong Mista Marape i kamap long taim Buckingham Palace i tokaut olsem King Charles i gat sik kensa na i go long haus sik long kisim tritmen.

“King Charles i gat longpela stori wantaim Papua Niugini, olsem na ol pipel bilong kantri i tingim em long pre bilong ol long dispela taim,” Praim Minista i tok.

“Papua Niugini i bung wantaim long soim sapot bilong en long King Charles III long dispela taim bilong bikpela salens.

“Mipela i tingim gutpela pren namel long tupela kantri na wantaim royal famili bilong Britain.”

Mista Marape i tok King Charles i bin kam long Papua Niugini 4-pela taim pinis.

“Prins Charles i bin kam long taim em i bin wanpela studen long Australia na i kam raun long Popondeta we em i bin slip long haus morata.”

Long 1975, taim Prince Charles i bin gat 27 krismas, em i bin makim Kwin Elizabeth long lukim Papua Niugini i kisim independens.

“Em i bin stap long selebresen na lukim plak bilong Australia i go daun na taim ol i apim plak bilong Papua Niugini long namba wan taim.”

Long 1984, Prins Charles i bin kam bek long na opim nupela Palamen Haus long Waigani.

“Tude dispela haus i sanap strong olsem mak bilong demokresi yumi bin kisim long Britain,” Praim Mista Marape i tok.

Mista Marape i tok tu olsem long taim em i bin bungim King Charles long London long 2022, em i bin askim em long kam amamasim 50 independens aniveseri bilong Papua Niugini long 2025.

PINIS.