Bihain long bikpela bung bilong ol long Mosbi long 11 Februeri, PANGU Pati i tokaut long namba bilong ol long stap redi long bungim oposisen sapos vot i no gat bilip i kamap.

PANGU SOIM NAMBA: Ol sapota bilong PANGI i bung long palamen long soim sapot bilong ol long pati na ol memba bilong ol.

Lina Keapu i raitim

BIHAIN long bikpela bung bilong PANGU Pati long las wiken long Mosbi, Pangu Pati i soim olsem ol i gat 52 Memba bilong Palamen (MP) i stap yet long pati.

Wantaim dispela 52, ol 4-pela nupela MP i joinim ol na i mekim namba i go antap long 56.

Dispela 4-pela MP em, Memba bilong Karimui-Nomane, Francis Alua, Memba bilong Mendi-Munihu, Raphael Tonpi, Memba bilong Kandrian-Gloucester, Joseph Lelang, Memba bilong Popondetta, Richard Masere husat i kisim Greens Pati i kam insait long Pangu.

Praim Minista James Marape long tok tenkyun long ol.

Em i tok Pangu i gat 52 na em i save olsem Pati em stap strong yet na i no bruk.

Mista Marape i tok em i no inap sindaun na lukluk long wanem samting bai kamap tasol em i givim salens long Oposisen long kisim namba bilong ol i kam long plua bilong Palamen.

Em i tok, “Ol lain i toktok planti long ikonomi i bagarap tasol ol i no save olsem taim gavman bilong mi i kam insait long 2019, mipela i strongim ikonomi long stap inap 2027.

“Ol rekot bilong mipela i stap, taim mi kisim opis long 4-pela yia go pinis, baset i bin stap long K79 bilien na mipela i apim baset i go antap long K32bilien.

“Yu ken sekap wantaim IMF, Wol Benk na ADB o Stetistik bilong Sentral Benk long dispela rekot.

“Taim mi kisim opis long 2019, mi promis long apim ikonomi i go long K200 bilien long 2029.

“Mi laik tokim ol pipel olsem dispela gavman i no slip tasol em i wok hat tru long groim ikonomi.

“Dispela i soim olsem mipela laik opim rot bilong moa wok bilong ol pipel, ol bisnis na moa mani long divelopmen insait long kantri,” Mista Marape i tok.

Mista Marape i tok long dispela vot no gat bilip, planti MP bai toktok long Konekt PNG program tasol mi laik tok olsem dispela olgeta toktok em i no stret.

Em i tok Konek PNG i wok long joinim ol provins na Gavman bilong en i putim mani long mekim ol rot we ol pipel i nidim.

“Dispela gavman i sanapim ol bris, ples balus – bikpela na liklik wantaim, ol telekomyunikesen na pawa tu.

“Gavman i no lustingting long Edukesen we i gat ol gutpela polisi we ol pikinini i mas gat gutpela skul na save wantaim.

“Dispela i wankain tu long Helt na ol arapela impoten sekta we i gavman i mas lukluk long en,” Mista Marape i tok.

PINIS.