Ol lida long Nesneel Palamen i givim tok sori bilong ol i go long dai bilong Mmemba bilong Usino-Bundi na Minista bilong Edukesen, Jimmy Uguro husat i dai long Is Sepik provins taim em i bin go long wanpela wok.

BIKPELA SORI: Praim Minista James Marapea wantaim ol arapela sinia Minista na Memba bilong Palamen i bin kamap long Jackson Ples Balus long Mosbi long bungim kofin bilong Mista Uguro long Tunde 6 Februeri. POTO: Lina Keapu/ Wantok.

Lina Keapu i raitim

GAVANA bilong Madang, Ramsy Pariwa i tok Madang i lusim wanpela gutpela lida husat i sevim Usino-Bundi na Madang long tupela yia.

Mista Pariwa i tok ol i wari nogut tru long wanem Jimmy Uguro i bin gat bikpela tingting long stretim ilektoret bilong em na Dipatmen bilong Edukesen tu.

Em i tok nau yet ol i no gat planti toktok long mekim bikos bel bilong ol i pas long sori long papa, brata, kandre na tambu bilong ol.

“Bai mi tok wanem nau, mi no gat moa toktok.

“Mi wantaim ol arapela lida long Madang i wari nogut tru.

“Mista Uguro i dai long wok em i save laik stret long mekim,” Mista Pariwa i tok.

Long wankain taim, Praim Minista James Marape i wari long wanpela gutpela Minista i lusim laip bilong em namel long wok.

Mista Marape i tok taim Mista Uguro i kamap Minista bilong Edukesen 4-pela yia i go pinis, em i no westim taim.

Em i statim wok na kamapim ol polisi we ol skul insait long kantri i wok long yusim.

Praim Minista i tok Mista Uguro i bin gat tingting long mekim edukesen sekta long PNG i wanpela gutpela sekta stret we olgeta manmeri i mas gat save.

Gavana bilong Enga, Sir Peter Ipatas i salim tok sori bilong em long ol pipel bilong Usino-Bundi, Madang na famili bilong Mista Uguro.

Sir Peter i tok Mista Uguro i bin wanpela hatwok Minista na i gat tingting na bel long ol pikinini long PNG na i kamapim gutpela polisi long helpim ol.

Gavana bilong Is Sepik, Allan Bird i tokaut long bel sori bilong em na ol pipel bilong Is Sepik.

Mista Bird i tok ol i pilim bikpela sori long wanem Mista Uguro i go long Is Sepik na bungim dai bilong em.

Em i tok, “Long makim maus bilong ol pipel bilong Is Sepik, mi tok sori long famili bilong Mista Uguro na ol pipel bilong Madang.”

Praim Minista James Marape i laik ol Dokta i katim Mista Uguro na painimaut long dai bilong em.

Mista Marape i tok em i laik mekim olsem long givim bel isi long famili na ol pipel bilong Usino-Bundi na Madang.

PINIS.