Goroka SDA sios i givim kaikai long ol silain long haus sik long helpim ol long stap gut na gat gutpela tingting long orait na lusim haus sik.

Sape Metta i raitim

Haus sik em i ples we ol manmeri save kisim helpim na tu kisim kaikai long moning, belo na avinun we haus sik yet i save givim.

Ol sikmanmeri save nidim ol gutpela kaikai na ol prut long helpim ol i orait.

Ol i save nidim ol ‘toiletries’ olsem sop, bras na marasin bilong wasim tit, toilet pepa, karamap bilong bebi na ol arapela samting.

Long dispela tingting, Adventis Ko­myuniti Sevis (ACS) aninit long Goroka Distrik Seven De Adventis (SDA) sios i bin kamap wantaim ol kaikai, prut na toiletris na bringim i go long givim long ol siklain long Goroka Haus Sik long 6 Septemba, 2023.

Hetman bilong Goroka Distrik SDA sios, Pasto Hamsley Tabiye i tok sios bilong em i kamap wantaim dispela ting­ting bilong serim ol blesing we i kam long Papa God wantaim ol lain long haus sik.

“Sapos Papa God i ken kirapim bel bilong mipela long mekim dispela pasin, long wanem as na bai mipela i pasim?

“Papa God em i blesim mipela olsem na mipela i mas serim dispela ol blesing wantaim ol arapela olsem dispela ol lain long Goroka haus sik,” Pasto Tabiye i tok.

Em i tok ol memba bilong ol lokal SDA sios long Goroka distrik i gat dis­pela pasin bilong bungim ol kaikai na ol arapela samting we ol i save givim long ol lain husat i gat nid long en.

Pasto Tabiye i tok dispela em i no fes taim long sios i mekim dispela pasin.

Em i save mekim long ol yia i go pinis na ol bai mekim yet.

Ekting Menesa bilong Goroka haus sik, Dokta Ian Wani tok amamas long ol memba bilong SDA sios husat i mekim dispela pasin.

“Mipela ol menesmen na ol wokman­meri long haus sik i gat bikpela amamas tru na tenkim yupela ol sios lain bilong SDA long Goroka distrik.

“Em i gutpela pasin long wanem taim sios na haus sik i wok wantaim long se­vim ol siklain.

“Taim yumi mekim olsem, dispela bai ken helpim ol siklain long kamap orait tu,” Dokta Wani tok.

PINIS. //