Ol kalabus i laik bai gavman i kamapim gen ol program we ol i ken yusim long lainim sampela samting long helpim laip bilong ol taim ol i pinis na bek insait long sosait.

Lina Keapu i raitim

OL lain i stap long haus kala­bus i laikim Nesenel Gavman i mas kirapim bek rihebilitesen program we i ken helpim ol long kamap gutpela manmeri taim ol i lusim kalabus.

Bomana haus kalabus em i wanpela bikpela haus kalabus insait long kantri we i save holim moa long 800 kalabus manmeri.

Wanpela kalabus man husat i no laik nem bilong em kamap ples klia, i makim maus bilong ol kalabus na i tok, bipo ol i save gat ol rihebili­tesen program ol kalabus i save wok long en.

Em i tok, bipo ol i save gat ol tred skul program olsem mekenikel, weld­ing, ilektrikel na kapentri we ol kala­bus i save mekim tasol em i kam na i stop long 2017.

“Long dispela taim i kam nau, mi­pela ol lain long bikpela kompaun i no save mekim wanpela samting mipela stap nating tasol.

“Ol Woda givim egrikalsa program long ol lain long Meksimam Sekyuriti Yunit (MSU) we ol i save wok.

“Na mipela lukim olsem dispela ol program i mas kamap long mi­pela olgeta.

“Sapos dispela ol program i ka­map gen insait long kalabus em i bai orait stret long wanem ol man­gi ken lainim ol tred wok na sapos ol i lusim kalabus bai ol i ken go bek na yusim dispela ol save long painim wok na stap gut,” em i tok.

Em i tok, narapela samting em skul long rit na rait we planti ol mangi ol i no save gut long dis­pela.

Em i tok, dispela tasol i save daunim ol man long go salensim keis long kot long wanem ol i no save long rit na rait.

“Mipela laikim ol Koreksenel Institusen (PNGCS) na Nesenel Gavman i luksave long mipela olsem mipela tu i man wankain olsem yupela.

“Yupela rausim fridom long mipela taim yupela kalabusim mi­pela tasol givim mipela skul we i ken helpim mipela long kamap gutpela man we mipela i ken go na stap gut insait long wan wan komyuniti bilong mipela.

“Nau yet em tupela program tasol i wok long go het, em pro­gram bilong lotu na katim gras we planti ol mangi save mekim tasol dispela i no helpim tumas.

“Mipela laikim olsem sampela senis i kamap long ol program na ol mangi ken mekim,” em i tok.

Em i tok, long ol program ol i ken helpim ol taim ol i stap insait long kalabus na long taim ol i kam ausait.

“Ol kalabus i save ranawe long banis bilong wanem ol i pilim skin i dai long wanem ol i no gat ol samting we i ken mekim ol i wok.

“Sapos i gat ol kain program ol woda i givim, bai ol i amamas long stap isi na lainim bipo long ol i lusim kalabus.

PINIS. //