Gavman i bilip nupela MTDP4 bai lukluk long sampela ol hevi long bipo we ol arapela MTDP i no bin inap long daunim o stretim.

PM Marape i kisim MTDP4 long ol pikinini makim wan wan provinsal bilas.

Lina Garry i raitim

Minista bilong Fainens na Plen­ing, Renbo Paita i tok Midiem Tem Divelopmen Plan Namba Foa (MTDP4) em i rot bilong ol pipel na gavman long mekim gut wok.

Mista Paita i tok MTDP4 em i wanpela gutpela dokumen we em i gat tingting na save bilong planti save manmeri na ol stek­holda.

Ol i putim wantaim long to­kaut long tingting bilong ‘Vi­sion 2050’ na Divelopmen Stratejik Plan 2010 i go long 2030, we Praim Minista bipo, Grand Chief Sir Michael So­mare i bin kamapim long taim bilong em.

“Mipela i gat bilip olsem dis­pela ol tingting mipela i putim wantaim bai karim kaikai.

“Planti bilong yupela bai ting olsem dispela MTDP4 i no inap wok bilong wanem ol MTDP bipo i no kamap gut na tu i gat hevi bilong ikonomi.

“Tasol mipela i go bek gen na lukluk gut long MTDP bilong bipo na painimaut ol hevi we i stopim wok long kamap.

“Narapela samting we i ka­mapim bikpela hevi long MTDP bilong bipo em mani, na tu sampela polisi na ol lo i mekim hat long ol dispela wok i kamap,” Mista Paita i tok.

Mista Paita i tok taim ol i laik toktok na putim tingting i go insait long ka­mapim namba foa plen, ol i kisim ol save lain long kantri na ol stekholda tu.

Em i tok ol i sindaun wantaim na tok­tok na ol i painimaut tu olsem, MTDP bilong bipo i no bin gat gutpela ol lida i go pas long mekim wok, no gat mani, provinsal, Nesenel na distrik plan i no go wantaim na ol arapela lo na polisi tu i no go stret wantaim ol plen.

“Marape-Rosso gavman i kamapim 12-pela ‘Strategic Priority Area’ (SPAs) o ol wok we ol i putim i go pas long ol­geta arapela wok.

“Namel long dispela ol 12-pela SPA em, Nesenel Sekyuriti, Konekt PNG Infrastraksa, Stratejik ikonomik In­vesmen, Kwaliti Edukesen na Skil Humen Kapitel, Kwaliti na Afodabel Helt Ke, Rul bilong Lo na Ristoretiv Jastis, Nesenel Riviu na Pablik Fainens Menesmen, Dijitel Gavman, Nesenel Statistik na Pablik Sevis Gavanens, Risets, Saiens na Teknoloji, Klaimet Senis na Natseral Envairomen Protek­sen, Populesen, Yut na Jenda Divelop­men, na Stratejik Patnasip.

“Dispela ol eria i mas gat ol lo na poli­si long lukluk gut we dispela MTDP4 bai karim kaikai.

“Mani em i wanpela hevi we mipela i lukim tasol yumi putim han wantaim na wok bai yumi lukim samting i kamap,” Mista Paita i tok.

Mista Paita i tok dispela em i no nu­pela samting na gavman i lukluk long mekim dispela plen i ran wantaim ol arapela plen.

PINIS