OL polis long Kimbe wantaim ol opisa bilong Kimbe Distrik Kot i givim strongpela tok lukaut long ol lain i save groim na salim ol drag na karim ol iligel gan long mekim trabel.

OL polis na opisa bilong Kimbe Distrik Kot i givim strongpela tok lukaut long ol lain i save groim na salim ol drag na karim ol iligel gan long mekim trabel.

I no long taim i go pinis ol polis i bungim klostu K1 milien drag na wokim bikpela paia na kukim.

Ol dispela drag na ol gan ol polis i bin kisim long ol trabel man namel long Mas na Novemba 2022. Kot keis bilong ol i pinis tasol ol polis i holim ol dispela samting inap ol i ken rausim long seif wei.

Ol i kukim ol drag na tromoi ol gan na katres long solwara.

Ol 32 pipel i bin kamap long ai bilong kot long sas bilong drag namel long mun Mas na Novemba 2022. Ol i go kalabus namel long tripela yia i go inap long 10-pela yia.

Long dispela taim tu, tripela trabel man i bin go kalabus long wan yia i go inap long 6-pela yia long holim ol hom-med gan na katres.

Dispela pasin ol polis na opisa bilong Kimbe Distrik Kot i mekim, i salim toksave i go long ol lain husati save salim drag na karim ol gan olsem kot bai givim strongpela mekimsave long ol.

Polis bai mekim wok bilong lukautim sindaun bilong komyuniti na bai ol i givim bikpela mekimsave long ol lain i save brukim lo.

PINIS.