Polis i tok no gat protes mas bai kamap long NCD dispela wik agensim Memba bilong Mosbi Saut, Justin Tkatchenko.

NCD Metropoliten Suparintenden, Silva Sika (raithan) na Asisten Komisina bilong NCD na Sentral, Anthony Wagambie (lephan).

 Lina Garry i raitim

NCD Metropoliten Suparintenden, Silva Sika i tok polis i no inap larim pablik mekim wanpela protes nau long taim we ol wol lida bai kamap long kantri.

Mista Sika i tok polis operesen insait long siti i wok long strong long wanem i gat planti toktok i kam long pablik long protes long rausim Memba bilong Mosbi Saut, Justin Tkatchenko.

Em i tok, sapos wanpela liklik pairap i kamap insait long siti dispela bai givim sem long PNG long ai bilong ol intenesenel komyuniti.

“Mi kisim wanpela pas long wanpela grup ol i tok ‘Coalition of Concerned Citizen’ long Tunde long mekim protes tasol mi tok nogat.

“Dispela grup i wok long toktok long olgeta lain long sosel media long dispela mas na tok long bung long PILAG o Pasifik Institut bilong Lidasip Gavanens long Waigani.

“Ol i tok long wokabaut long PILAG na i go olsem long Palamen long givim petisen long Praim Minista James Marape long rausim Tkatchenko.

“Tasol mi tok nogat long wanem ol wol i lukluk long PNG stap,” Mista Sika i tok.

Mista Sika i tok em i tingim tu ol bisnis komyuniti husat i pret long lusim ol samting long dispela kain taim.

Em i tok, sapos ol pipel i belhat long toktok bilong Tkatchenko ol i mas go long kot o wokim wanpela petisen long gavman na no ken pulim pablik i go insait long dispela.

“Polis bai go het long wok bilong ol na wok wantaim ol komyuniti long lukautim ples.”

PINIS.