Opis bilong Minista bilong Provinsal na Lokal Level Gavman, Soroi Marepo Eoe i singsaut long olgeta 90 Distrik Divelopmen Atoriti (DDA) insait long PNG long givim 2022 Enuel Ripot bilong ol nau.

Anna Solomon i raitim

OLGETA 90 Distrik Divelopmen Atoriti (DDA) long Papua Niugini mas givim Enuel Ripot bilong 2022 i go long opis bilong Minista bilong Provinsal na Lokal Level Gavman, Soroi Marepo Eoe nau.

Mista Eoe i bin salim wanpela sekula instraksen Namba 03/2023 i go long olgeta Siaman bilong ol DDA Bod, ol Distrik Edministreta na Sif Ekseketiv Opisa bilong ol Distrik Divelopen Atoriti long salim ol ripot bilong 2022.

Em i tok dispela oda i no karamapim Nesenel Kepital Distrik na Atonomus Rijon bilong Bogenvil.

Mista Eoe i tok tu olsem ol nupela DDA bilong Hiri- Koiari, Popondetta, Delta Fly, Wau-Waria, Nakanai, Porgera- Paiela na Komo-Hulia Distriki no ken wari long salim 2022 Enuel Ripot.

Mista Eoe i tok em i yusim pawa bilong em aninit long Seksen 20 bilong District Development Authority Act 2014 long givim oda long olgeta Distrik Edministreta/ Sif Ekseketiv Opisa bilong wan wan DDA long wok wantaim Dipatmen na redi ol Enuel Ripot aninit long Seksen 34 bilong Distict Development Authority Act, 2014 na Quarterly Reporting long Provinsal Gavman aninit long Seksen 33 bilong District Development Authority Act, 2014.

Olgeta ripot bilong ol DDA i mas kamap long opis bilong Minista bilong Provinsal Afeas long 31 Mas, 2023.

PINIS.