Ol lida bilong ol Tred Yunien insait long PNG i no laikim tok sori bilong Justin Tkatchenko na ol i singaut long em long lusim kantri.

Mista Tkatchenko. POTO: Wantok File.

Lina Garry i raitim

Long Janueri 2020, 7-pela mun bihain long Praim Minista James Marape i bin kisim wok olsem Praim Minista, em i bin toktok strong long olgeta Minista na ol het bilong ol gavman dipatmen long no ken raun nating long ol arapela kantri.

Mista Marape i bin mekim wanpela strongpela toktok long olgeta Minista na ol Seketeri bilong ol dipatmen long kisim tok orait long opis bilong em pastaim long raun bilong ol long arapela kantri.

Long dispela taim em i tok raun bilong ol Minista na ol het bilong gavman dipatmen i mas stap ples klia long wanem opis bilong em na opis bilong Sif Seketeri i mas save long raun bilong ol.

Bihain long tripela yia nau, PNG gat bikpela hevi wantaim Minista bilong Foren Afeas husat i kisim pikinini bilong em, Savannah Tkatchenko i go long Koronesen bilong King Charles III long las wik long London.

Dispela i hatim bel bilong olgeta manmeri bilong PNG taim Mis Tkatchenko i kamapim wanpela video long sosel media long wokabaut bilong ol.

Taim ol pipel i stat long mekim kain kain toktok long video bilong Mis Tkatchenko, papa bilong em Mista Tkatcheko i kamap long ABC Australia nius na bagarapim ol dispela pipel bilong PNG wantaim dispela ol toktok ‘primitive na useless animal’.

Dispela ol toktok i hatim bel bilong ol pipel na ol i singaut long Mista Marape i mas rausim Tkatchenko olsem Foren Afeas na rausim sitisensip bilong en na salim em go bek long kantri bilong em.

Planti manmeri, ol memba bilong palamen, ol lida bilong ol sios, ol lida bilong ol tred yunien i no laik tok sori bilong Mista Tkatchenko long wanem ol toktok bilong em i kamap long wol na i kamapim piksa nogut long PNG.

Long makim maus bilong ol lida bilong Tred Yunien, Presiden bilong Polis Asosieisen Lowa Tambua i tok, gavman i mas kisim bek sitisensip pepa bilong Mista Tkatchenko na rausim em i go bek long kantri bilong em.

Ol i tok, sapos em i no gat rispek long PNG na tok yumi ol ‘primitive na useless animal’ long wanem as tru bai em i stap namel long yumi?

“Mipela i no ‘primitive na useless animal’.

“Mipela i no laikim tok sori bilong em tu, mipela i no laikim Marape makim maus bilong ol pipel na kisim sori bilong em.

“Gutpela em olsem Mista Tkatchenko i mas lusim PNG nau yet na no ken stap long wanem belhat i stap yet,” Mista Tambua i tok.

Ol arapela ol lida i mekim wankain toktok na singaut long Minista Marape i harim toktok bilong ol pipel na rausim em.

PINIS.