Ol manmeri husat i lusim ples na i go stap long ol bikpela taun na siti mas luksave long ol papagraun bilong dispela ples bipo long ol i mekim haus na sidaun long graun bilong ol

 Joseph Dawai i raitim

MOSBI Saut Memba bilong Palamen (MP), Justin Tkatchenko i tokim ol manmeri long tingting gut pastaim long ol i kam sidaun long taun na siti.

Mista Tkatchenko i mekim dispela toktok taim em i bin baim hap bil bilong 71 blok bilong Hausing Komisin long Gorobe setelmen long Badili.

Planti setelmen insait long Mosbi Saut ilektoret i no stap gut long wanem ol i sidaun long graun bilong ol papagraun na i no gat gutpela as.

Long narapela as ol pipel i mas sekim gut husat ol papagraun na stretim ol pastaim long ol i ken sidaun long graun bilong ol.

Olgeta manmeri husat i laik sidaun gut long ol eben eria long stet o kastomari graun i mas painim aut pastaim olsem husat em i papa bilong graun.

Mista Tkatchenko i tok ol manmeri mas i gat tingting bilong bihainim pasin na lo bilong kisim na baim graun long ol papagraun, long dispela kain pasin bai gavman o kampani bai no inap bungim hevi bilong eviksen long bihain taim.

Mosbi Saut i gat planti graun bilong ol asples tasol ol pipel i kam toktok wantaim ol papagraun na baim ol graun long liklik prais, na i no gat Pisikel Plening Bod na Bilding Bod tok orait olsem na bihain long dispela hevi ol i save givim i go long ol atoriti olsem Nesenel Kapital Distrik Komisin (NCDC).

“Dispela em i bikpela salens long wanem ol manmeri mas i gat haus bilong stap long en tasol ol i mas stretim gut wantaim ol atoriti, na long dispela kain rot ol i ken stap longpela taim long haus bilong ol,” Mista Tkatchenko i tok.

Em i tok dispela kain wok em planti ol papagraun i laik mekim samting stret long helpim ol yet long bihain taim.

“I gat tupela samting, ol famili na klen i go salim graun i no gat tok orait bilong klen, dispela pasin i no kamap tasol long Mosbi, em i wok long kamap long olgeta hap bilong kantri,” em i tok.

Graun i gat lo bilong ol tubuna i banisim na i no bilong wanpela famili tasol long wanem ol pipel i bin kam kisim graun long strong klen insait long wanpela traib olsem na graun insait long PNG i no save stap long nem bilong wan wan famili grup.

Graun em klen tasol i save papa long en na ol klen memba i mas sidaun na toktok pastaim long ol i salim graun long ol ausait man husat i laik baim graun long ol.

Mista Tkatchenko i tok strong olsem i gat bikpela hevi bilong graun i wok long kamap long kantri long wanem yumi wok long abrusim lo bilong ol tubuna.

PINIS.