La Nina o bikpela kol na ren bai kamap long PNG namel long Novemba na Disemba long dispela yia, o Jenuari long neks yia olsem na ol piel na gavman i mas redi long dispela.

Lina Keapu i raitim

LA Nina o bikpela kol na ren bai kamap long PNG namel long Novemba na Disemba long dispela yia, o Jenuari long neks yia. Dispela bai kamap long senis bilong ‘Climate’ na nogut bai kantri lukim tu ‘Tropical Cyclone’ o strongpela win we bai kam olsem long ‘Coral Sea’ long saut-is.

Long wanpela ‘outlook’ ripot i kam long Nesenel Weda Sevis, em i tok, La Nina bai stat nau i wantaim ren long saut-is sait we bai yumi lukim planti hevi bilong graun. Taim ol i tok hevi bilong graun em, bikpela win, wara bruk, graun bruk, kaikai bai bagarap, na kainkain sik tu bai kamap. Dispela ripot i tok tu olsem, raun bilong ren bai senis sampela taim long PNG.

Bipo La Nina i save kam long taim bilong ren na i save pudaun long planti hap long PNG tasol i no long ol Niugini Ailan na Milen Be.

Wantaim dispela ren long kantri, i gat bikepla sans bilong ol sekta olsem agrikalsa, infrastraksa, wara bilong dring na helt bai bungim hevi. Dispela bai kamap long saut-is sait bilong PNG na hap bilong kantri tu.

Long Noten hap bilong PNG, ol i lukim drai yet na i luk olsem bai ol i no inap lukim ren long narapela tripela mun moa.

Saut Bogenvil na Niu Ailan i wok long stap yet long bikpela drai we ren i no kam o liklik stret i pudaun.

Olsem na long abrusim dispela ol hevi bilong bikpela win, na ol hevi bilong graun PNG Gavman i mas gat plen i stap long helpim ol pipel bilong en long taim bilong dispela ol hevi.

PINIS.