Bipo Kumul kosa na nupela gavana bilong Is Niu Briten provins, Michael Marum em i no memba bilong wanpela politokal pati, tasol em i go joinim PANGU long wanem em i tok, em i save long lida bilong Pati, James Marape longpela taim olsem famili.

 WELKAM: Mista Marape i welkamim Michael Marum taim em i kamap long Mosbi long Fraide las wik, 29, Julai. POTO: Lina Keapu.

Lina Keapu i raitim

BIPO kosa bilong PNG Kumuls, Michael Marum husat ol manmeri save singautim em olsem “Super Coach” i winim sia bilong Is Niu Briten provinsol.

Mista Marum i win wantaim 33,285 vot namel long 22 kendidet husat i resis wantaim em long dispela 2022 Nesenel Jeneral Ileksen.

Mista Marum em i ran olsem wanpela independen kendidet na i rausim pastaim gavana na Pipels Nesenel Kongres Pati kendidet, Nakikus Konga long iliminesen 16.

Mista Marum i tok, em bai wok wantaim olgeta open memba bilong provins long neks 5-pela yia.

Em i tok tu olsem em bai stap yet olsem wanpela independen kendidet tasol em save long PANGU pati lida, James Marape longpela taim olsem famili, na long dispela as i joinim kem bilong PANGU Pati bihain long em go bek na toktok wantaim ol lain bilong em.

Em i tok bikpela amamas bilong em long ol pipel bilong Is Niu Briten long gat bilip long em na makim em olsem gavana bilong ol.