Kessie Sawang em wanpela meri kendidet tasol long Nesenel Jenerel Ileksen (NGE) bilong 2022 husat i stap yet long resis wantaim ol man. Mis Sawang i go pas long resis long Rai Coast open ilektoret long Madang wantaim 5,001 vot bihain long 43 bokis.

LAIKIM SENIS: Mis Sawang i go pas long Rai Coast open resis. POTO: Kessie Sawang Official Facebook Page.

Andrew Molen i raitim

KLOSTU bai ol rit bilong 2022 Nesenel Jenerel Ileksen (NGE) i go bek na no gat wanpela meri kendidet i winim yet wanpela bilong ol 118 sia bilong 11 palamen.

Namel long olgeta meri husat i resis insait long NGE dispela, wanpela tasol i stap yet long resis.

Kessie Sawang i go pas long resis long Rai Coast open ilektoret long Madang wantaim 5,001 vot bihain long 43 bokis.

Bihain long Mis Sawang em Blaise Bayema wantaim 3,926 na namba tri ples em Peter G. Sapia wantaim 3,569.

Mis Sawang em wanpela long 167 meri husat i resis agensim 3,458 man long 118 sia insait long palamen.

Klostu bai Papua Niugini i lukim 50 krismas bilong em olsem wanpela independen kantri tasol insait long dispela taim, 7-pela meri tasol i bin kamap memba bilong palamen long histori bilong kantri.

Dispela em i namba tu ileksen Mis Sawang i resis long en bihain long em i traim long 2017.

Olsem planti ol arapela meri husat i putim han i go antap long kamap nesenel lida long palamen, Mis Sawang tu i laik lukim sampela gutpela senis i kamap.

Tasol resis bilong ol meri long ileksen em i no isi bilong wanem ol i save sanap agensim ol man husat i gat moa sapot, moa mani na moa strong long pulim sapot.

Dispela i no stopim ol meri tasol em i save mekim resis bilong ol i hat moa long ol man.

Long las palamen, i no bin i gat wanpela meri sidaun long palamen.

Sapos ol pipel bilong Rai Coast i givim gut sapot long Mis Sawang na em i no lusim mak em i stap nau long kaunim rum, PNG bai lukim wanpela nupela meri lida i sidaun na paitim tok wantaim ol man gen long Waigani long 11 palamen