Bihain long dai bilong siiting memba bilong Sumkar, Chris Nangoi i bin dai, namba bilong ol kendidet i go daun long 57 tasol dispela em stil i wanpela bikpela namba tru bilong ol lain i sanap resis long NGE insait long PNG.

TOK AMAMAS: Mista Dum i tok amamas long gutpela pasin ol pipel bilong ples Karkum i soim ol poling opisal. POTO: James G. Kila.

James G. Kila i raitim

PLANTI kain kain toktok i wok long raun nau yet long Karkar ailan na tu long bikples long Sumgilbar long husat tru bai winim 2022 Nesenol Jeneral Ileksen bilong Sumkar Open na makim ol insait long Nesenel Palamen.

Sumkar distrik long Madang provins i karamapim tupela eria, em Karkar LLG we ol i stap long ailan, Bagbag na bikples Sumgilbar LLG.

Long dispela yia 2022 NGE i lukim Sumkar Open i stat wantaim 58 kenidet i nominet long resis.

Tasol bihain long nominesen siting memba, Chris Nangoi i bin dai, na bihain dispela, namba bilong ol kendidet i go daun long 57.

Dispela em wanpela bikpela namba tru bilong ol lain i sanap resis long NGE insait long PNG.

Wanpela komyuniti lida long Sumgilbar LLG, Willie Mayang i tokaut olsem Karkar ailan oltaim i save makim Sumkar Open long Nesenel Palamen.

Stat long 1975 i kam, ol lain lida bilong Karkar tasol i save win na go insait long palamen.

“Stat long 1975 yet, na pastaim long en tu i kam em ol lain long Karkar ailan tasol i save win long Sumkar Open,” Mayang i tok.

“Mipela ol lain long bikples long Sumgilbar i nogat populesen olse mol lain Karkar olsem na oltaim ol i save win,” em i tok.

Mista Mayang i tok ol lain pipel bilong Karkar ailan i save gut long vot na ol i save blokim na givim vot long kendidet bilong ol.

Ol lain long bikples long Sumgilbar em ol i save bihainim tasol kaikai na abus na ol i no save makim gutpela lida bilong ol long bikples long makim ol.

Em i tokaut olsem ol lain wan-tokples olsem ol lain Gabak i no save plenim gut na sanapim wanpela gutpela lida bilong ol long makim ol long taim bilong ileksen, ol i save givim vot i go long ol man long ailan oltaim.

Long wankain taim, asisten ritening opisa long Sumgilbar LLG, Reuben Dum i tok amamas long pasin ol pipel bilong ples Karkar, Sarang-Dylup, Megiar na Biranis i wokim long kamapim gutpela poling.

Mista Dum i tok ol poling opisal em i go pas long en olsem tim faiv, i no bungim hevi.

Ol i wokim wok stret na pinisim poling gut long Sumgilbar eria na em i tok amamas long gutpela pasin ol komyuniti long dispela ol ples i soim.

Kaun bilong Sumkar Open bai kamap long Gospel Laithaus Foaskwea Sios long Madang taun.