OL kongrigesen bilong Mary, Queen of the Pacific peris long Waigani, Nesenel Kepital Distrik, na ol arapela memba bilong Katolik sios, i bungim moa long K1.2 milien long sanapim nupela haus lotu bilong ol.

Joseph Dawai i raitim

OL kongrigesen bilong Mary, Queen of the Pacific peris long Waigani, Nesenel Kepital Distrik, na ol arapela memba bilong Katolik sios, i bungim moa long K1.2 milien long sanapim nupela haus lotu bilong ol.

Dispela i soim olsem namba bilong ol sios memba i wok long i go antap long taim ol i save i go long sios long olgeta Sande, na stap insait long sampela sios ektiviti.

Mista Lasia, wanpela memba bilong fanresing komiti husat i bin salim laki tiket inap long 12-pela mun long kamapim rot bilong bildim nupela sios, i soim bikpela amamas tru.

Em i tok olpela haus lotu nau i stap inap 60 yia olsem na ol i laik bildim nupela haus lotu long mekim ol bilipman na meri i amamas long go long lotu.

Mista Lasai i tok ol dispela laki tiket ol i bin salim long ol Katolik peris long Mosbi na ol narapela provins na insait long kantri, na tu long ol ovasis wantaim.

Em i tok sios i bungim moa long K650,000 long droim tiket bilong ol lain insait long kantri na sampela lain long Australia na United States.

Siaman, Joe Baki, i tok olpela haus lotu i bin kamap long 1971 na ol i bin amamasim 61 aniveseri long Ogas, 2021 na nau ol i mas kamapim nupela bilding bilong moa long 3,000 sios memba bilong dispela peris.

“Taim peris i muv i go yet, ol sapot i wok long kam long sait bilong bodi na spirit wantaim na peris i wok long lukluk i go het long narapela 60 yia i kam,” em i tok.

Em i tok tenkyu long ol pipel husat i bin baim ol tiket, ol sponsa na sampela lain husat i helpim long kain kain liklik rot long bungim dispela mani.

Peris i bin salim laki tiket bilong; K200 soping vausa, ol mobail fon, laptop, fenisa, TV set, masin bilong wasim klos, wanpela Nissan Sedan, na Toyota Land Cruiser kar.