Deputi Polis Komisina na Sif bilong Operesen, Anton Billie, i tok amamas long ol pipel bilong Westen hap bilong Hailans rijon long ol i vot gut na i no bin i gat trabel i kamap long ol provins long dispela hap.

GUTPELA VOT: Vot i kamap gut long Westen hap bilong Hailans rijon. POTO: RPNGC.

DEPUTI Polis Komisina na Sif ov Operesen, Anton Billie, i tok amamas long ol pipel bilong Westen Hailans, Jiwaka na Simbu provins bikos i no bin gat trabel i kamap long ol dispela provins long taim ol pipel i go vot.

Mista Billie i tok, “Long taim ol pipel long Jiwaka i bin vot las Fraide na Westen Hailans wantaim Simbu, i no bin gat ripot bilong trabel i kamap. I no gat ripot bilong ol lain i stilim ol balot boks na mi mas tok tenkyu long ol pipel i wok bung na i no kamapim trabel.

“Sampela distrik long Westen Hailans na Simbu i no bin vot long namba wan de bikos long ren na planti maunten. Tasol mipela i ting bai olgeta wok i ran gut long hap bilong Hailans Isten Koman,” Mista Billie i tok.

Mista Billie i tok long ol demokretik kantri, ol pipel i mas fri long makim lida bilong ol na i no gat vailens o fosim ol pipel. Em i tok ol pipel bilong dispela tripela provins i mas kisim luksave long kamapim seif na fri ileksen.

Em i tok dispela gutpela pasin i soim tu olsem i gat ol gutpela lida long ol dispela tripela Hailans provins.