POLIS Komisina David Manning i tok i no gat as long ol toktok lida bilong PNC Pati, Peter O’Neill i mekim long em

Polis Komisina, David Manning i tok i no gat as bilong ol toktok bilong Mista O'Neill.

POLIS Komisina David Manning i tok i no gat as long ol toktok lida bilong PNC Pati, Peter O’Neill i bin mekim long em.

Mista O’Neill i bin sutim tok long Polis Komisina bihain long Manning i bin salim pas long Ilektoral Komisina long sekap long ol ballot boks we komplen i kamap olsem 12,500 vot pepa bilong Kagua Erave Open ilektoret i bin stap insait long ol boks bilong Ialibu Pangia Ilektoret.

Mista Manning i tok em i bin kisim komplen pas long wanpela kendidet bilong Ialibu Pangia Open na stetmen we i tok moa long 12,500 vot pepa bilong Kagua Erave i bin stap insait long ol bokis bilong Ialibu Pangia ilektoret.

Dispela kendidet i bin salim komplen bilong em i go tu long Praim Minista, PNG Ilektoral Komisina, Ritening Opisa bilong Ialibu Pangia, Provinsal Ileksen Menesa na ol arapela kendidet.

Olsem na Mista Manning i bin salim pas long Mista Simon Sinai long no ken kaunim ol vot i stap long dispela balet boks inap ol i sekap gut pastaim.

Em i tok, “Mi laik lukim olsem ileksen i kamap long stretpela rot na i seif.

Tasol i gat planti ol lida husat i no wari long wanem kain pasin ol i bihainim long winim dispela ileksen.”

Mista Manning i tok em i save olsem Ilektoral Komisina tasol i ken mekim disisen long wanem samting i kamap long ileksen, tasol em i tok, ol Polis i gat pawa long mekim wok painim na sasim ol pipel husat i brukim lo.

“Dispela pas bilong mi em long tok save long Ilektoral Komisina olsem i gat sampela asua i kamap na em i ken mekim disisen long wanem samting bai kamap bipo long kriminal investigesen i kamap na moa vailens na blut kapsait.”

Em i tok ol polis bai givim infomesen ol i kisim long Ilektoral Komisin long skelim. Tasol em i tok ol polis i mekim investigesen bilong ol yet bikos dispela pasin i brukim lo bilong ileksen.

“Mi singaut long ol lida long soim rispek long proses bilong ileksen na ol opisa bilong gavman husat i mekim wok bilong 2022 nesenel jeneral ileksen.

Sapos risal bilong ileksen i soim olsem yu lus, orait yu mas soim olsem yu trupela lida na yu wanbel.

No ken sutim tok long proses na ol ilektoral opisa na sekyuriti fos.”