Bihain long ol i no kisim wanpela gutpela bekim long Port Moresby General Hospital long dai bilong pikinini bilong ol long operesen rum, papamama bilong Rex nau bai kisim ol i go long kot.

Pot Mosbi jenerel hausik.

Joseph Dawai i raitim

PAPAMAMA bilong wanpela pikinini husat i dai long Pot Mosbi Jeneral Haus sik i kisim ol woka i go long Waigani Distrik kot long las wik Trinde.
Leit Rex Wanzing wantaim 4-pela arapela pikinini i bin kisim operesen long Ogas 12, 2021 long haus sik tasol ol i bilip olsem (anaesthetic) drak ol dokta i yusim, ol i kolim, ‘Propofol’ i bin kilim em i dai.
21-pela witness bilong haus sik, planti bilong ol, em ol doktai stap insait long lista bilong ol wok painim aut bilong korona we i bin sanap long ai bilong kot wantaim ol papamama bilong Rex.
Het Mejistret, Josephine Milage wantaim 4-pela arapela mejistret i bin sindaun long skelim dispela komplen bilong tupela.
Pastaim Sif Jastis, Sir Arnold Amet i bin helpim Wanzing famili long namba wan kot tasol em i bin givim wok i go long narapela kaunsil (loya) long mekim wok bilong tupela bilong wanem long Nesenel Jeneral Ileksen.
Sir Arnold i bin tokim kot olsem wanpela indipenden investigesen ripot em Helt Minista Jelta Wong i bin tok orait long dispela kot i mas kamap.
Olsen na kot i askim loya i makim dipatmen, Lilian Kauba long kamap long dispela kot, tasol Mis Kauba i tokim kot long givim em inap taim long em i mas lukluk gen long dispela ripot.
Mis Kauba i tok sampela ol dokta i no bin i stap long dispela taim asua i bin kamap, em ol i mas rausim nem bilong ol long lista bilong kot.
Tasol Mejistret Milage i tokim em olsem olgeta dispela lain i stap long lista i mas kamap long kot na bai kot yet i skelim.
Leit Rex i gat 14-pela krismas na em i stap long gret 7, long Carr Memorial Adventist Praimeri skul long Waigani long taim em i bin dai. Em i bin bon long Me 20, 2007 na i dai long Ogas 13, 2021.
Kot i bin kamap long Julai 25, na narapela kot i bin kamap long 15-19 Ogas, 2022 long dispela wik.