Planti manmeri i bilip planti samting i no kamap gut long nesenel jeneral ileksen bilong 2022.

Hia em sampela tingting bilong ol manmeri long Mosbi lng wanem samting ol i ting long Nesenel Jeneral Ileksen bilong dispela yia.

John Agua: Ileksen i no bin kamap gut long ol det we Ilektoral Komisin i makim. Astingting bilong dispela em yumi no save. Dispela i kamapim hevi long ol poling senta. Piksa em long wanem samting i kamap long ATS we wanpela meri dai. Ilektoral Komisin i mas kamap wantaim stretajik plen bilong narapela ileksen bilong abrusim ol dispela kain hevi.

Clarence Badaira: Pasin bilong ol pipel long dispela ileksen em i no orait tumas. Dispela i kamap long wanem ol i tait long wetim taim bilong ol long vot.   Ol i go i kam long sekim  poling na kauntim na ol i no kisim ansa ol i laikim. Poling i no kamap long taim olsem na ol pipel i kros na kamapim planti hevi. Ilektoral Komisin i mas stretim menesmen bilong em na mekim senis long narapela ilkesen.

Paul Mitna: Nomol proses bilong ileksen em olsem, bihain long poling, kauntim i mas stat bihain long 24 i go 48 aua. I no bihain long wanpela wik. Kauntim bilong MNE i no kamap long taim em i mas kamap. Na dispela i kamapim planti bel hevi namel long ol sapota. Ol kendidet i tromoi bikpela mani long lukautim ol sapota bilong ol husat i kam wetim taim bilong kauntim long stat. Long wankain taim, dispela i ken pusim ol trabol man long kamapim hevi we yumi olgeta i no laikim.

Marvin Aure: Hevi bilong Nesenel Jeneral Ileksen bilong 2022 i stat yet long Ilektoral Komisin. Namba wan hevi em ol nem long komon rol. Ilektoral Komisin i mas bin apdetim ol nem bilong ol vota longtaim yet. Planti vota i no bin gat nem long buk taim ol i laik go putim vot bilong ol.

Waugla Willie: Mipela olgeta vota i kam slip kirap long kauntim eria long wanem mipela i laik lukim tru husat kendidet bai win. Mipela i no laikim paul pasin i kamap olsem na mipela i kam stap na lukluk. Ilektoral Komisin i pulim taim tumas long statim kauntim bilong MNE.

Robert Norman: Proses  bilong ileksen mipela i save. Em i no nupela samting. Dispela dilei we i kamap i soim olsem sampela lain i laik haijekim proses bilong ileksen. Bihain long poling, ol kauntim opisal, ol Ritening opisa, prisaiding opisa, i mas redi pinis. Taim bilong kauntim em i no taim bilong ol opisa long kisim trening.