James Marape em i Praim Minista bilong Papua Niugini yet inap long nait bipo long palamen i makim nupela Praim Minista. Ol MP na Minista bai wolim wok bilong ol tu inap ol rit i go bek.

LIDA: Mista Marape em i Praim Minista yet inap palamen i makim nupela lida bilong kantri. POTO: PM's Department.

Andrew Molen i raitim

Klostu long wanpela wik bihain long James Marape i winim bek sia bilong Tari Pori open, em i kalap long balus na karimaut wok olsem Praim Minista bilong Papua Niugini yet.

Namba wan wok em i mekim em long go long namba 51 bung bilong Pacific Islands Forum (PIF) long Suva, Fiji we em bai kam bek long en tude (Fonde, Julai 14).

Planti toktok i kamap olsem dispela em i no stret long wanem, kantri no gat gavman long nau yet taim nesenel ileksen i wok long kamap yet.

Ekting Praim Minista, John Rosso long Tunde dispela wik i tok Mista Marape em i praim minista yet na olgeta minista na gavman tu i holim wok bilong ol yet inap ileksen i pinis na ol rit i go bek.

Mista Ross o i tok long ol nius ripot olsem dispela i wankain long planti ol narapela kantri tu.

“No gat wanpela kantri bai stap nating we i no gat gavman i stap long lukautim em,” Mista Rosso i tok.

Aninit long lo bilong PNG, olgeta MP na ol minista bai holim wok bilong ol yet inap long ol rit i go bek.

Praim Minista na Spika bilong Palamen tasol bai holim wok bilong ol inap long 12 klok nait bipo long de we ol bai makim nupela Praim Minista na Spika.

Tasol long dispela taim, Mista Marape bai no inap long mekim ol disisin o givim tingting na mekim promis olsem het bilong gavman bilong PNG.

Mista Marape i lusim kantri long Tunde dispela wik na i go bung wantaim ol lida bilong narapela 18 kantri insait long PIF.

Sampela samting ol i toktok long en em COVID-19, senis bilong hat bilong graun (climate change) na ol wok politiks insait long Pasifik na Osenia rijon.

Bihain long em i kam bek, Mista Marape bai go stap long Wewak long Is Sepik provins wantaim ol arapela memba bilong PANGU Pati long redi long kamapim nupela gavman.

Em i tok husat ol arapela memba o pati i laik join o wokbung wantaim ol i ken go stap wantaim ol long dispela kem.

Mista Marape i tok em i kisim kem bilong ol i go long Wewak long tingim bek na tu soim rispek long papa bilong kantri, Gren Sif Sir Michael Somare husat i dai long las yia.

Long wankain taim, lida bilong People’s National Congress (PNC) Pati, Peter O’Neill i tok em i gat bilip na strongpela tingting olsem ol bai inap long kamapim nupela gavman na em bai kamap Praim Minista gen.