OL MEMBA bilong Palamen i soim las rispek long Memba bilong Sentral Bogenvil, Sam Akoitai asde Trinde 5 Janueri.

Ekting Spika na Memba bilong Markham, Koni Iguan i bin go pas long dispela seremoni. Praim Minista James Marape i tok Akoitai i wanpela gutpela na strongpela lida na dai bilong em bai lusim bikpela ples i stap nating long ol pipel bilong em. Em i tok Akoitai i wanpela strongpela man bilong tok pait long ol ajenda long palamen, moa long sait bilong maining indastri. Akoitai i no long taim, i bin go raun long Porgera long witnesim tok orait bilong ol papagraun na gavman long ol toktok bilong statim gen Porgera gol main long Enga Provins. Bihain long palamen, ol i holim lotu bilong Memba long Sioni Kami Memorial Yunaitet Sios haus lotu. Tude famili bilong em i kisim bodi na i go bek long Bogenvil long planim. Mista Akoitai i bin dai long las mun long taim em i wok long givim toktok long ol yangpela husat i wok long stretim wanpela liklik bris long Wakunai we tait i bin rausim. Akoitai i bin stap Minista bilong Maining namel long 2002 i go long 2007, na i kamapim ol gutpela lo bilong maining indastri. Em i lusim sia bilong em bilong Palamen long 2007 tasol i winim gen long 2017 Jeneral Ileksen. Em i namba 6 Memba bilong Palamen long dai long dispela namba 10 Palamen. Ol narapela memba bilong palamen husat i dai em Johnny Alonk, Memba bilong Midel Ramu; Roy Biyama, Memba bilong, Midel Flai; Richard Mendani, Memba bilong Kerema; Thomas Pelika, Memba bilong Menyamya; na Sir Mekere Moruata, Memba bilong Mosbi NotWes.

Paul Zuvani i raitim