KOREKSENEL Sevis Institut (CIS) i givim K20,000, wanpela pik na wanpela bulmakau i go long Ledi Veronica Somare na ol pikinini bilong Gren Sif Sir Michael Somare long sapotim ol long dispela taim ol i stap long sori na bai ol i  mekim ol pasin kastom bipo long ol i karim bodi i go long Is Sepik Provins na putim long graun.

Ol i mekim dispela pasin insait long wanpela program bilong givim rispek long Sir Michael ol yet i holim long Pot Mosbi long Tunde. Insait long dispela program ol kalabus manmeri na CIS wokmanmeri i soim sori bilong ol long famili bilong Sir Michael.

“Pasim bikpela sori bilong mipela ol lain long haus kalabus i go long Ledi Veronica, olgeta pikinini na bubu wantaim, mipela olgeta long haus kalabus i wankain, ol woda na kalabus manmeri wantaim i gat bikpela bel buruk olsem Gren Sif em i lusim mipela,” CIS Komisina Stephen Pokanis i tok.

Dulciana Somare Brass, laspela pikinini meri bilong Sir Michael husat i gat 48 krismas i bin makim maus bilong mama bilong en Ledi Veronica na ol bratasusa bilong en na i go stap long dispela taim. Dulciana i amamas long pasin ol CIS i mekim long em na ol famili bilong en na tu em i amamas moa long lukim olsem ol kalabus manmeri i sindaun namel long ol CIS opisa na ol arapela wokmanmeri bilong CIS. Em i save olsem Papa bilong en Sir Mir Michael i save laikim na strongim dispela kain pasin bilong bung wantaim.

“Mi kam wantaim wari tasol mi gat bikpela amamas tru. Planti gutpela toktok na pasin i kamap, tenkyu Komisina Pokanis. Mipela i paul long toktok. Tupela wik i go pinis mipela i harim olsem Papa i gat sik kensa na bihain long tupela wik em i lusim mipela.

“Mipela Papua Niugini i gat planti kain kain kastom na kalsa i stap tasol taim yumi bung wantaim, kain olsem nau mi ken lukim trupela pasin bilong Papua Niugini. Ol kalabus manmeri i no sindaun long narapela hap na ol wokmanmeri i no sindaun long narapela hap, Papa bilong mi stap na em lukluk na em i amamas long dispela kain pasin bilong bung wantaim.

“Politikal independens em bikpela samting em i save pilim long bun.Taim em toktok long bung wantaim  em toktok long yu man bilong mekim asua, yu gutpela man, mipela olgeta i wankain na i mas sanap wantaim,” Dulciana Somare Brass i tok.

Rebecca Negere i raitim