Komisina bilong Polis David Manning i laikim Polis Intenal Afes Dairektoret long mekim wokpainimaut kwiktaim long dai bilong wanpela yangpela man long Nesenel Kepital Distrik bihain long ol polis i paitim em.

Ol i bilip olsem ol polisman long 6-mail i paitim dispela yangpela man na em i bin dai long Sarere. Ol memba bilong 6-mail komyuniti i protes long Sande tasol ol polis i kam stopim ol.

Komisina Manning i tok em i laikim wokpainimaut i mas kamap long dispela na ol arapela bikhet pasin bilong ol polis.

“Mipela ol polis i no stap antap long lo. Ol i bilip long mipela ol polis long lukautim ol laip na propeti na bringim ol lain husat i brukim lo i kam long lo. Wok bilong mipela em i no bilong bagarapim ol sitisen bilong mipela. Olgeta sitisen maski ol i raskol o saspek i gat rait long jastis long kot,” Mista Manning i tok.

“Mipela polis i no inap long skelim o mekim save long ol man. I gat mak bilong fos mipela i ken yusim long ol manmeri. Mipela i no inap long i go het na paitim ol saspek taim mipela i holim ol na pasim pinis han bilong ol na i inap tu long pretim ol arapela polisman o ol manmeri long komyuniti.”

Mista Manning i mekim dispela tok taim em i tokaut long Polis Intenal Afes Dairektoret opis i surik i go stap long Airpot polis Post long 7-Mail long NCD. Em i tok opis i op pinis long pablik long i go putim komplen bilong ol.

Em i tok, longpela taim tru ol polis na hevi insait long dipatmen i no wok long go long han bilong lo na em i laik stopim dispela pasin nogut.