Ol helt woka husat i gat moa long 60 krismas o husat i gat sik insait long bodi i mas ritaia o lusim wok long dispela taim bilong COVID-19 hevi.

Hetman bilong Riprodaktiv Helt, Obstetrik na Gainakoloji long Yunivesiti bilong Papua Niugini, Dokta Glen Mola mekim dispela tok i no long taim i go pinis.

Em i tok tu olsem, ol helt woka husat i pilim olsem ol i no inap long wokim nomol wok bilong ol insait long dispela taim bilong COVID-19, ol i ken lusim wok o kisim liv we i nogat pe long en.

Dokta Mola i tok, ol i mas mekim ol haus sik bilong COVID-19 i go bikpela sapos i gat nid na inap namba bilong ol helt woka i mas i go wok insait.

“I bin i gat moa long hanret nes i aplai long sampela posisen i no long taim i go pinis olsem na dispela i soim olsem i gat planti nes i stap husat i wok long painim wok i stap,” Dokta Mola i tok.

Em i tok tu olsem olgeta arapela helt sevis i mas i go het na givim sevis long ol pipel.

“Ol helt sevis i mas i go het long stretim ol sik pikinini, ol bel mama, na ol arapela medikol hevi na ol sejikol keis. Tasol ol i mas stop long mekim ol arapela sevis olsem kosmetik sejeri, infetiliti na ol liklik sua na sik nabaut we panadol i ken helpim.

“Sapos yumi no mekim dispela, planti mama bai dai long hevi bilong karim bebi na planti lain bai dai long ol arapela sik olsem nimonia na TB na i no long COVID-19,” Dokta Mola i tok.

Tasol, em i tok ol wan wan helt woka husat i gat krismas daunbilo long 60 na i no gat sik long bodi bilong ol, ol i mas no ken pret long laip bilong ol na laip bilong famili bilong ol bikos long mak bilong wanpela yangpela helti man long dai long COVID-19 em i stap daunbilo long 1- pesen.

“Yumi bin lainim long stretim na stap wantaim ol sik olsem TB na HIV we i kilim planti man pinis long en. Nau yumi mas lainim long stretim na stap wantaim COVID-19 we i no kilim planti man yet,” Dokta Mola i tok.

Rebecca Negere i raitim