BIHAIN long wanpela yangpela meri i dai long han bilong man bilong em, Papua Niugini i singaut long stopim vailens.

Ol pipel bilong PNG i laikim gavman bilong ol long lukluk long hevi bilong Jenda Beis Vailens (GBV) we i wok long kamap bikpela insait long kantri na mekim sampla eksen long daunim dispela hevi.

Las wik Fonde i lukim moa long handret man meri na yut i werim blakpela klos na i wokabaut long Unagi Oval long Gordons i go olgeta long Haus Palamen long Waigaini long singaut long ol lida bilong kantri long mekim eksen long GBV.

Long las wik tu, ol wan wan ogenaisesen olsem, Bank South Pacific, Internal Revenue Commission, PNG Air, Vanguard International na ol arapela ogenaisesen i werim blakpela klos na i mekim awenes long wokples bilong ol long daunim GBV.

Ol dispela samting i kamap bihain long wanpela GBV keis i kamap we i lukim wanpela man nem bilong en Bhosip Kaiwi i kilim meri bilong en na mama bilong tupela pikinini bilong en Jenelyn Kennedy. Jenelyn i bin marit long Bhosip taim em i bin gat 15 krismas na krismas bilong en i 19 taim man bilong en Bhosip i kilim em.

Ripot i tokaut olsem Bhosip i lokim Jenelyn long rum na i kilim em isi isi insait long faivpela de inap Jenelyn i lusim laip bilong en.

Komisina bilong Polis na Kontrola David Manning i givim oda long wanpela wokpainimaut long kamap long wanem samting i bin kamap long hevi bilong Jenelyn Kennedy tupela krismas i go pinis i kam inap taim em i dai.

Mista Manning i tok, ripot i soim olsem man bilong Jenelyn, Bhosip Kaiwi i bin abyusim Jenelyn long moa long 2-pela krismas.

“Ol atoriti olsem polis i mekim wanem long lukautim Jenelyn? Bilong wanem na ol polis i no bin i go insait na helpim Jenelyn insait long dispela bagarap rilesensip? Ol famili memba i bin stap long wanem hap taim Jenelyn i kisim bagarap long faivpela de bipo long em i dai?

“Dispela em ol askim we mipela i mas askim na painim bekim. Sistem bilong mipela i wik, insait long polis, insait long lo, insait long welfea na long kot. Mipela i mas sekim, luksave na senisim o rausim ol wiknes insait long sistem na larim ol meri i stap gut na i nogat birua i bungim ol,” Mista Manning i tok.

Em i mekim ol dispela tok bihain long Pot Mosbi Famili na Seksual Vailens Yunit (FSVU) i givim ripot bilong ol long wanem samting i kamap long Jenelyn tripela mun bipo long em i dai.

Dispela stori i bin go aut long sosel midia na planti manmeri na ol ogenaisesen i no bin wanbel na i bung wantaim na wokaubaut i go long Palamen long tok nogat long GBV.

Long Fonde nait long Sir John Guise stedium, ol man i werim blakpela klos na i bung na laitim kendol long soim sapot bilong ol long daunim GBV long kantri.

Dispela wokabaut i singaut long tu long gavman i mas lukluk long vailens ol meri i mekim long ol man tu.

Rebecca Negere i raitim