LAS wik Praim Minista James Marape i tokim wanpela kibung bilong Wafi Glopu wantaim ol stekolda bilong en long Lae Intanesenel Hotel olsem Papua Niugini i no nupela long maining.

“Papua Niugini i save pinis long ol benefit na ol pen i save kam wantaim maining na ol arapela divelopmen wok bilong kisim risos long graun. Inap nau, ol pen na hevi i kam wantaim dispela ol wok i winim ol benefit,” Mista Marape i tok.

“Dispela ol pen i kam long bagarap i save kamap long envairomen na long taim yumi no tilim gut ol benefit bilong dispela wok divelopmen.

“Olgeta taim yumi toktok long maining yumi save tingim dispela rabis samting i bin kamap long Panguna Kopa Main we i bin bagarapim envairomen na kamapim bikpela pait na ol pipel i vot long bruk lusim Papua Niugini,” em i tok.

 Nesenel Gavman bai i painim wanpela gutpela rot long wok bilong Wafi Golpu i go het na olgeta pipel, gavman na kampani insait long dispela projek i mas win.

Praim Minista Marape i tok “Nesenel Gavman bai i bihainim konstitusen na ol lo bilong dispela kantri long mekim olgeta i win long dispela maining wok bai i kamap. Em i tok, “Tasol dispela rot bai i no isi.”

Em i toktu olsem ol papagraun bai i no wanbel long wanpela na narapela, ol papagraun bai i no wanbel wantaim gavman, ol disktrik bai i no wanbel wantaim provinsal gavman na provinsal gavman bai i no wanbel wantaim nesenel gavman na gavman bai i no wanbel wantaim kampani, tasol olgeta i gat wanpela hap ol bai i bung. Dispela wanpela hap em lo bilong yumi long kantri.

Insait long dispela kibung ol memba bilong nesenel gavman, Morobe provinsal gavman, ol het bilong ol dipatmen, ol sios lida, ol pablik seven, ol papagraun na ol lida bilong ol komyuniti we bai i lukim sampela senis i kamap i bin stap.

Rosa Koian i raitim