Stet Ov Imejensi Kontrola na Polis Komisina David Manning i rausim olpela 37 SOE oda em i bin givim bipo na i givim nupela 13 SOE oda bihain long Palamen i vot long muvim SOE i go long narapela 14 de las wik.

Rebecca Negere i raitim

Mista Manning i tok em i bin givim ol dispela nupela oda long Tunde Jun 2 bihain long Palamen i bung long helpim Gavman bilong PNG long i go het na daunim hevi bilong COVID-19.

“Ol dispela oda i stap long helpim mipela long stopim COVID-19 long kam insait long kantri na tu long stopim em long i go i kam long olgeta hap long kantri taim Palamen i go het na tok pait long nupela bil we bai kamapim nupela nomol bilong ol pipel namel long COVID-19.

“Yumi olgeta i gat wokmak bilong opim ai na redi na stap,” Kontrola Manning i tok.

Mista Manning i singaut long olgeta pipel bilong PNG, ol visita, na ol bisnis long wokbung wantaim ol Join Ejensi Task Fos long lukautim PNG long COVID-19.

Bipo long SOE i bin stat long Mas 23 na i pinis long Jun 2 na nupela SOE i stat long Jun 2 yet na bai pinis long Jun 16. Nupela 13 oda bilong dispela 14 de SOE i sanap olsem:

Imejensi Oda Namba 1: SOE Kontrola Manning i rausim olgeta SOE Oda em i bin givim bipo.

Imejensi Oda Namba 2: Bisnis na Sosel ektiviti i pas. SOE Kontrola Manning i pasim olgeta man o ples we i save salim bia. Em i tok orait tasol long ol ples i gat laisens bilong salim bia olsem ol bikpela stua, ol hotel na haus kaikai, na ol klap.

Em i tok nogat wanpela profesenel spot tim bai trening long dispela taim inap ol i kisim tok orait bilong PNG Spot Faundesen. Na ol bikpela bung bilong lotu i no ken kamap. Olgeta lain mas bihainim sosel distensing na ol gutpela prektis.

Imejensi Oda Namba 3: Intanesenel na Domestik trevol. SOE Kontrola Manning i tok ol manmeri stap long narapela kantri i mas kam long wanpela Pot bilong entri tasol na i go insait long 14 de kwarentain. Ol manmeri long provins tu i no ken i go i kam long boda.

Imejensi Oda Namba 4: Olgeta Nesenel Imejensi Oda SOE Kontrola i givim i mas kamap long olgeta provins bilong PNG.

Imejensi Oda Namba 5: Kontrola Manning i tok olgeta Pablik Yutiliti Sevis olsem pawa, wara, benk, PMV na o arapela i mas op yet na i no gat wanpela man i mas pasim.

Imejensi Oda Namba 6: Ol balus, kar o sip i brukim lo bilong SOE bai kalabus inap SOE i pinis.

Imejensi Oda Namba 7: Ol sampela samting olsem sampela kaikai we SOE i no givim tok orait long en bai Polis i kisim na holim i stap.

Imejensi Oda Namba 8: Ol bisnis i mas no ken apim prais bilong ol prodak i go antap moa long 5 pesen long taim bilong SOE.

Imejensi Oda Namba 9: Long askim bilong Pot Mosbi Jeneral Haus sik o provinsal haus sik gavman i ken makim wanpela hap we ol i ken planim ol man i dai na gavman bai lukautim kost.

Imejensi Oda Namba 10: Ol medikel Saplai we Gavman bilong PNG i baim long daunim COVID-19 i mas kam insait long kantri kwiktaim na i no ken wet long baim takis na mekim ol arapela kastom diuti long sipot na epot.

Imejensi Oda namba 11: Nogat wanpela masin, man o ogenaisesen bai mekim COVID-19 test na nogat wanpela COVID-19 test risal bai i go aut inap SOE kontrola i tok orait.

Imejensi Oda namba 12: Dokta i mas kisim blut bilong ol lain husat i gat sik olsem kus o nimonia na ol arapela kus sik na mekim test bilong COVID-19.

Imejensi Oda namba 13: Goroka bai-ileksen i surik i go antap bikos long 14 de SOE.