KAINANTU Sekendri Skul (KSS) i bihainim gut olgeta oda bilong COVID-19.

Taim ol i opim skul gen long mun Me, skul edministresen i mekim olgeta samting em inap long mekim skul i stap seif long ol sumatin na tisa.

Long geit ol i hangamapim bikpela toksave em i tok ol sapos ol sumatin I no put mask ol bai i no inap go insait long skul.

Wanpela tisa long skul Mista B. Gerald i tok ol sumatin i harim tok na bihainim na ol sekyuriti long geit tu i mekim gut wok bilong ol.

Ol i putim tu 10-pela wara tep long skul bilong ol sumatin i ken wasim han bilong ol. Dispela wara i kam long wanpela wara tenk em i sindaun antap long het bilong klasrum na i ran i go insait long wara sistem bilong PNG Water saplai.

Long olgeta wan wan de i gat ol senitaisa bilong rabim long han i stap long klasrum.

Long bihainim oda bilong sosel distens ol Gret 10 na 12 i go skul long Mande, Trinde na Fraide na ol Gret 9 na 11 i go long Tunde na Fonde.

Ol i brukim wanpela klas i go tupela na tupela tisa i tisim ol sumatin.

KSS i bilip long gutpela edukesen bilong ol sumatin.