Wok bilong ol tisa, wankain olsem olgeta pablik sevan na ol arapela wokmanmeri em long bringim lait i go long ol manmeri husat i no gat gutpela sans long edukesen na ol arapela sevis.

Ezekiel Lawrence i raitim

DAIREKTA bilong Radio Maria, Fr. Martin We-en i singaut long olgeta Katolik tisa i mas kamap olsem sol na lait long ol sumatin bilong ol na skul ol i stap long en.

Wok bilong ol tisa, wankain olsem olgeta pablik sevan na ol arapela wokmanmeri em long bringim lait i go long ol manmeri husat i no gat gutpela sans long edukesen na ol arapela sevis.

Fr Martin i toktok strong long ol Katolik tisa i mas sanap strong long wok bilong ol, na givim taim bilong ol long lainim ol sumatin long pasin na lo bilong Jisas Kraist.

Em i tok long kamap olsem sol na lait, ol Katolik tisa i mas kamap pren bilong olgeta sumatin na papamama, na ol i no ken laikim wanpela na les long narapela.

“Yupela ol tisa i mas toktok wantaim olgeta sumatin long wankain level, wankain olsem God i laikim yumi olgeta long wankain level.

“No ken ranawe long wok bilong yu, maski yu no kisim mani o yu no gat kaikai.

“Na sapos hevi i kamap long skul, ol tisa na bod i mas stretim gut olgeta hevi wankain olsem ol disaipel na ol aposel bilong Jisas i save stretim hevi,” Fr Martin i tok.

Em i strongim ol tisa long redim gut olgeta lesen bipo long ol i go long klas, na ol i mas kamap long skul o klas bipo long olgeta sumatin i kamap.

Fr Martin i tok rot bilong skulim ol pikinini i no stap tasol long ol sabjek ol tisa i save lainim ol sumatin, tasol em i stap long veliu bilong wanem samting ol tisa i lainim ol sumatin long en.

“Mi laik singaut long olgta tisa i mas skulim ol pikinini wantaim tingting na lewa bilong ol,” em i tok.

Ol Katolik tisa long kantri i bin amamasim Nesenel Katolik Tisa De long Mande 15 Me long skul bilong ol.

PINIS.