Long taim Asbisop bilong Rabaul, Karl Hesse MSC bilong Katolik sios i dai long Vunapope haus sik long Is Nu Briten long 4 Me 2023 bihain long em i bin sik.

Asbisop Karl Hesse i dai long Sande 14 Me, 2023.

ASBISOP Karl Hesse MSC i dai long Vunapope haus sik long Is Nu Briten long Sande 14 Me 2023 bihain long em i bin sik. Krismas bilong em i bin 87 long taim em i dai.

Mama i bin karim em long 15 Ogas 1936 long Germany.

Em i bin ritaia long wok bilong Asbisop na i stap long Vunapope.

Asbisop Karl Hesse i bin kamap oksileri bisop bilong Rabaul long 27 Epril 1978. Long 24 Oktoba 1980 em i kamap bisop bilong Kavieng na Manus.

Pop i bin makim em Asbisop bilong Rabaul long 7 Julai 1990 na em i kisim wok long 16 Septemba 1991.

Long 11 Ogas 2011, Pop Benedict XVI i tokaut olsem Asbisop Karl Hesse i risain long wok bilong em na Asbisop Francesco Panfilo i kisim ples bilong em.

Asbisop Karl Hesse i mekim wok bilong pris, bisop na asbisop bilong Katolik sios long Niugini Ailan rijon. Tasol em i mekim tu wok bilong helpim laip na sindaun bilong ol pipel long helt, edukesen na stadi long kalsa na raitim buk tu.

Long taim vokeno i bin pairap na bagarapim laip bilong ol pipel long Is Nu Briten em i bin wanpela lida husat i go pas long helpim ol pipel husat i bin kisim bagarap.

Asbisop Karl i bin winim 52 krismas long 1988, we em i bin makim silva jubili olsem pris na 10-pela yia olsem bisop na em i bin kisim Federal Cross of Merit with Ribbon.

Long 1 Janueri 2002, Kwin Elizabeth 2 i bin givim em namba ol i kolim Member of the British Empire. Na long 2009 em i kisim bikpela luksave long gavman bilong PNG long 40 yia sevis long kantri. Gavman bilong PNG i givim em tu Order of the Logohu.

PINIS.