16 Julai long dispela yia em i bikpela de insait long kalenda bilong ol pipel bilong Our Lady of Mt Carmel Peris long Hanahan, Bogenvil, em i de we ol i bin amamasim 100 yia bilong Katolik Sios i kamap long ples bilong ol.

OL pipel bilong Our Lady of Mt Carmel Peris long Hanahan, Bogenvil. Em i de we i bin amamasim 100 yia bilong Katolik Sios long ples bilong ol long Sarere 16 Julai.
Bikpela lotu i bin kamap long Hanahan Peris we Vika Jeneral Fr Policarp Kaviak, i blesim senteneri ston i makim100 yia bilong peris. Moa long 20 pris long ol peris long Bogenvil i bin kamap na stap insait long dispela lotu. Planti tausen ol Katolik bilipman na meri wantaim ol Kristen bilong ol arapela sios i bin stap tulong makim dispela bikpela de.
Ol i bin statim dispela bikpela selebresen long Fonde 14 Julai we ol i bin wokabaut bihainim rot ol namba wan misineri i bin kisim long taim ol i kamap long tais nambis long Karolla. Ol i wokabaut inap tri aua samting long kamap long Hanahan misin stesin.
Namba tu hap bilong seremoni i bin kamap long Fraide 15 Julai, long Hahalis we ol dispel misineri i bin sindaun pastaim na bihain ol i lusim na muv i go stap long Hanahan Peris long 16 Julai1922.
Fr Policarp i bin pasim liklik dua long pinisim 100 yia na i opim narapela dua gen long makim 100 yia bilong peris long ol yia i kam bihain.
Ol studen bilong Hanahan peris skul i bin lusim 100 balun i go antap long makim dispel namba wan 100 yia bilong peris bilong ol.
Ol i opim na blesim tu wanpela liklik haus lotu long Hahalis long Fraide 15 Julai.
I bin gat ol singsing na danis na ol lida i sanap toktok long makim dispela bikpela de.
Ol selebresen i pinis long Mande bihain long local memba na Vais Presiden, Patrick Nisira,i pasim ol selebresen bilong makim 100 yia bilong peris. - New Dawn FM.