PASTO Keito Oiyapa i tokim Gut Seped Luteran Sios long Koki, NCD olsem tok tru inap mekim yumi kamap fri.

Pasto Oiyapa husat i mekim wok misin olsem pasto bilong Balimo Luteran sios long Middel Flai Distrik long Westen provins i mekim dispela tok. Em i tok bikos long dispela taim bilong COVID-19 i gat planti toktok i wok long kamap na paulim tingting bilong ol Kristen manmeri na pikinini na dispela i mekim planti pipel i lusim bilip long God. Em i tok i gat planti imfomesen ol pipel i wok long givim na olgeta i no wankain na planti ol pipel i wok long pret na toktok nabaut.   Long Jon 8: 31-40 Jisas i tokim yumi long holim pas tok tru na bihainim long wanem yumi no slev bilong sin. Pasto Oiyapa i tok Baibel em i tok tru bilong bihainim na painim laip i stap oltaim na olsem Kristen yumi mas go bek na painimaut tok tru. “God i bin mekim man wankain olsem piksa bilong em yet long gaden Iden na em winim win bilong em i go insait na man i kamap. “Taim man i pundaun long sin em i lusim tingting long God na traim long mekim samting long laik na tingting bilong em yet, olsem na Jisas i kam daun long graun na tokim yumi olsem em yet i tok tru na laip,” Pasto Oiyapa i tok. Em i tok sapos save na tingting bilong man i laik mekim yumi bilip long wanem tingting man i  mekim orait dispela ol infomesen ol man i wok long givim yumi bai i no inap kamap tru olsem pastaim ol samting ol i traim na i no bin karim kaikai bilong en. “Save na tingting bilong man i no save karim kaikai tasol toktok na pasin bilong Papa God wanpela tasol i save kamap tru na i no save senis,” Past Oiyapa i tok.

Joseph Dawai i raitim