BIHAINIM askim bilong Pop Francis, Bisop Dariusz Kaluza bilong Bogenvil Daiosis i bin raitim wanpela pas long ol pipel bilong daiosis long holim wanpela daiosisen pastoral kaunsil kibung.

Em i plen long holim dispela kibung long Janueri, 2022. Bikos sios i wok long bungim planti salens na dispela i kisim tu bilip bilong ol manmeri long dispela taim, Pop Francis long Janueri dispela yia i bin kamap wantaim sampela askim long olgeta Katolik Sios lida na ol bilip manmeri long rot bilong bungim dispela ol salens.

Pop Francis i bin rait na mekim ol askim olsem bikos yumi kolim yumi yet i sios, dispela tok i kamap ples klia long wanem rot? Em i laik bai sios long wan wan kantri i mas kamap wantaim ol ansa olsem em bai singautim wanpela kibung long 2023 long harim dispela ol bekim na kisim ol long strongim sios.

Pop Francis i tok bikos yumi kolim yumi i sios, wanem rot yumi stap laip long Krais? Long yumi i sios stap laip long Krais o nogat? Yumi bihainim tingting bilong Holi Spirit? Yumi save larim Holi Spirit i stiaim yumi? Yumi gro wantaim skul bilong Jisas na yumi i stap laip long Krais, yumi wari na helpim ol lain i stap longwe long sios? Na bilong wanem ol arapela Katolik i stap longwe long sios?

Bihainim dispela ol askim Bisop Dariusz i laikim ol lida bilong wan wan ol sabperis na peris i mas kamap long Daiosisen Pastoral Kaunsil kibung olsem daiosis i gat ol bekim long dispela ol askim na givim i go long Katolik Bisop Konprens (CBC) bilong Papua Niugini na Solomon Ailan long kibung bilong ol bisop. Bihain long dispela presiden bilong CBC na Kardinal Sir John Ribat bai makim tupela kantri na bringim i go long Rom long 2023 bung bilong ol mausman bilong ol bisop long wan wan rijon na givim dispela ol bekim.