OLGETA yia long de 7 Julai, em i spesel de bilong Katolik Sios insait long Papua Niugini.

Katolik Sios i selebretim de bilong Blesed Pita ToRot, wanpela Katekis bilong Rakunai, insait long Rabaul Asdaiosis long Is Niu Briten.

Planti Katolik manmeri i save wokim pilgrimis i go long Rakunai olgeta yia bipo long dispela sik COVID-19 i kamap.

Nau manmeri i no inap  mekim pilgrimis yet bikos COVID-19 i bin pasim wokabaut o i go kam bilong Katolik manmeri.

Long las wik, long de 5-10 Julai, 2021 long rit bilong Gutnius olgeta de long kalenda bilong Katolik Sios i stori long Jisas i bin makim 12-pela Aposel bilong em, na bihain em i salim ol i go long mekim wok bilong autim Gutnius.

Long Sande 11 Julai 2021, stori  bilong Jisas i salim ol aposel bilong em long mekim wok.

Dispela ol stori long Gutnius i wankain olsem pasin bilong yumi sapos yumi wokabaut long balus, yumi laik bai karim liklik samting, i no ken abrusim mak ol balus kampani i tokim yumi long em.

Planti bilong yumi i no laik baim moa samting long abrusim mak em ol i makim long em.

Olsem na yumi save wokabaut na karim samting bihainim mak bilong em.

Wankain pasin, Jisas i bin tokim ol Aposel bilong em long ol i no ken karim mani, no ken karim planti klos na ol arapela samting.

Jisas i tokim ol olsem, bikos em i laik bai ol i putim tingting na laik bilong ol long mekim wok bilong God na harim tok bilong God olsem ol i no ken wari long kain kain samting bilong graun.

Bilip long God tasol, bai kamapim samting yumi nidim long en long wok ples bilong yumi.

Em i tokim ol aposel bilong em olsem, taim ol i mekim wok bilong autim Gutnius, bai i no olgeta manmeri bai welkamim ol.

 Sampela bai amamas, tasol sampela bai nogat.

Sapos ol i welkamim disaipel, disaipel i mas stap long dispela haus o komuniti inap long pinisim wok bilong ol.

Tasol sapos ol manmeri i no welkamim ol, taim ol disaipel i lusim haus na ples, ol i mas rausim  pipia i pas long lek bilong ol.

Dispela rot em i bilong givim tok lukaut long manmeri husat i no welkamim ol olsem sampela samting nogut inap kamap long ol o komyuniti bilong ol.

Taim yumi ritim dispela stori bilong Jisas i salim ol disaipel bilong em long mekim wok misen, em i no salim 12-pela Aposel tasol. Nogat.

Ol 12-pela Aposel i go pinis. Nau em i taim bilong yumi Kristen manmeri long dispela taim.

Yumi i kisim baptais pinis, em i mak yumi kamap disaipel bilong Jisas. Nau em i salim yumi long go na mekim wok bilong autim tok bilong God.

Yumi wan wan i gat wok misin bilong yumi long kain kain ples. Sampela i mekim wok misin long skul, long gavman opis, long gaden, long maket, long stua na ol arapela ples moa.

Wanem hap yu stap na mekim wok bilong yu, em i wok misin bilong yu. Yu mekim wok bilong sevim manmeri bilong God long wok yu mekim.

Olsem na tok lukaut bilong Jisas long Aposel, olsem ol i mas luksave olsem i no olgeta manmeri bai amamas long wok bilong yumi.

Pita ToRot, taim em i mekim wok Katekis bilong em, i no olgeta manmeri i wanbel na amamas long wok em i mekim.

Sampela i welkamim na soim i amamas, tasol sampela i nogat. Ol man i no amamas long em, ol i painim rot long bagarapim laip bilong em. Ol i ting long kilim em i dai, bilip bilong Katolik Sios tu bai dai.

Tasol ol i asua long dai bilong Bleset Pita ToRot, bilip bilong Katolik Sios i kamap strong moa na planti manmeri i bilip long God.

Em i tru! Olgeta hap yumi stap na em sampela bai amamas tasol sampela bai nogat na traim long pasim o bagarapim wok yumi mekim.

Tasol yumi tu i mas tingim olsem; yumi bai i  no inap mekim olgeta manmeri i amamas!

STORI TASOL NO. 351

Fr. Paul Liwun SVD