WOK odit (audit) i helpim long lukim ol ogenaisesen i ran gut, wanpela senia opisa i tok.

Turisim Promosen Atoriti (TPA) Sif Ekseketiv Opisa Eric Mossman i tok kamapim ol odit
wok long wanem dispela i helpim ol gavman dipatmen na ogenaisesen lo karimaut na
promotim ol prinsipel na veliu bilong trensperensi na gut gavanens.
Em i mekim dispela tok long las wik long taim TPA i lonsim odit komiti bilong em long Pot
Mosbi.
Mista Mossman tok planti taim ol hetman bilong ol pablik opis i save mekim disisen na
karimaut ol wok we planti lain i no save na dispela i ken givim sans long pasin korapsen i
kamap.
Em i tok TPA i no save kamapim mani bilong em yet tasol na i save kisim helpim long
gavman long mekim wok.
Long dispela as mani, ripot bilong pablik mani i mas kamap na stap ples klia.
“Olsem wanpela askim aninit long Pablik Fainens Menejment Ekt, 2016 aninit long seksen 9
we dispela i askim ol pablik opisa long ol i mas kamapim ol wok odit long olgeta yia,”
Mossman i tok.
“As bilong TPA i kamap wantaim Odit wok i bihainim dispela lo.
“Dispela long lukim TPA i inap askim bilong kamapim gut gavenens na mekim klia ol wok
bilong em.
“Dispela intanel odit komiti em bai kamap olsem wanpela referens long soim mipela long rot
mipela i mas mekim wok.
“Dispela em wanpela namba wan mak bilong kamapim gutpela gavanens.
“Yumi i ken kamap long gutpela mak bilong gut gavanens sistem sapos yumi gat wanpela
strongpela odit komiti long soim mipela long rot bilong mekim wok.”
TPA long 2021 Mani Plen i kisim inap long K10 milien insait lo rikarent baset (recurrent
budget) na 5 i go lo K10 milien long divelopmen baset olgeta yia long promotim ol turisim
ektiviti insait long kantri.
Deputi Sekreteri bilong Fainens Dipatmen Margaret Tenakanai i amamas long TPA i kamap
wantaim odit tim na askim ol arapela pablik opis long bihainim wok bilong TPA na kamapim
odit tim bilong ol yet.

“Insait long PNG, kamap wantaim odit komiti em nupela long ol.”
Mossman i tok Seksen 5, 1 (a) bilong amended Pablik Fainens Menesmen Ekt, 2016 i askim
olgeta Stet ejensi long kamapim helt ejensi bilong ol yet.
Tenakana i tok i gat moa long 700 gavman opis husat i save kisim mani long gavman tasol 53
ogenaisesen, wantaim TPA, tasol i gat kain intanel odit komiti.

Willie Brul i raitim