OL studen bilong 9-pela Katolik sekenderi skul long Nesenel Kepital Distrik (NCD) i bin bung long namba tri media edukesen semina long wokim ol sotpela muvi bilong kamapim senis.

Sosel Komyunikesen Komisin bilong Katolik Bisop Konprens (CBC SOCOM) i bin go pas long ol wok bilong kamapim dispela semina long 26 i go inap 28 Jun long Emmaus Konprens Senta, Boroko.

Fr Ambrose Pereira sdb, Seketeri bilong Sosel Komyunikesen Komisin i toktok long ol senis ol sotpela muvi i ken kamapim insait long ol komyuniti.

Em i tok, “Impoten hap bilong dispela program em i no bilong toktok long ol aidia o nius stori tasol, tasol em i bilong soim tu olsem wanem yumi ken kamapim senis long yumi yet, na lukim senis i kamap tu long level bilong gavman.”

Namba wan hap bilong dispela semina long Fraide 26 Jun em ol toktok bilong COVID-19. Charlotte Vada husat i makim Caritas Australia i bin go pas long dispela sesen. Em i toktok long ol ‘nupela nomol’ na ol 6-pela ki COVID-19 toksave. Na em i salensim ol studen long tokaut long ol dispela pasin bilong abrusim dispela sik.

Bihain long dispela, Fr Ambrose Pereira i glasim ol muvi em ol studen i bin wokim long namba tu Midia Semina.

Long namba tu de, Carol Aigilo, wanpela savemeri bilong Envairomen na Janice Warak wanpela tisa bilong Marianville Sekenderi skul i bin toktok long envairomen. Ol i toktok long klaimet senis na wanem kain bagarap em i ken kamapim long laip bilong ol pipel.

Namba tu hap bilong program, ol lain bilong CBC SOCOM i tokktok long wei bilong wokim ol Storyboard 20 Second Film na wei bilong wokim ol Sotpela Film. Ol i soim ol studen pasin bilong kamapim wanpela storyboard na wokim wanpela 20 seken muvi long COVID-19 na wanpela 2-5 minit muvi long envairomen.

Long namba tri de bilong semina, Sheryll Isoaimo, wanpela tisa bilong Jubilee Sekenderi skul i toktok long wei bilong raitim ol stori. Ol studen i raitim ol stori bilong dispela midia semina na ol i bin gat sans tu long intaviu ol arapela studen.

I bin gat taim tu bilong ol studen i stap isi na wokim ol prea na wokim ol liklik pilai namel long ol yet.

Long pinis bilong dispela semina, ol student i bin lukim 18 sotpela muvi. Asbisop Emeritus Francesco Panfilo sdb, na nupela Asbisop Rochus Tatamai MSC, Bisop Donald Lippet wantaim ol prinsipel bilong ol skul na ol arapela lain, i bin lukim ol dispela muvi.

Fr Ambrose i tok tenkyu long ol skul i bin salim ol studen kam stap insait long dispela program na em i askim ol long sapotim na promotim wok bilong ol studen.

Ol 9-pela skul husat i bin stap insait long dispela program em Don Bosco Teknikel Institut Boroko, Don Bosco Teknikel Skul Gabutu, Marianville Sekenderi skul,Limana Vokesenel skul, De La Salle Sekenderi skul, La Salle Teknikel Koles, Caritas Teknikel Sekenderi, Jubilee Katolik Sekenderi skul na Charles Lwanga Sekenderi skul.

Abigail Seta i raitim