Intanet em i gutpela samting bilong helpim long kisim infomesen tasol sapos ol papamama i no was, bai ol pikinini i ken yusim long mekim ol narapela samting we i ken bringim birua long ol na ol arapela.

Joseph Dawai i raitim

OL papamama i gat wok long lainim ol pikinini long we bilong yusim mobail fon bilong ol.

Dispela toktok em Jeneral Sekreteri bilong PNG Sios Kaunsil (PNGCC) Reveren Roger Joseph i mekim long tupela de aweanes long Pot Mosbi Katolik Aksdaisen long 5mail.

Rev. Joseph i tok planti pasin nogut na dai wok long kamap long pasin bilong yusim fon.

I gat planti skul pait na pasin nogut i wok kamap bilong wanem ol sumatin i wok long lukim ol piksa nogut long intanet, na dispela i mekim ol i wok long kamapim dispela pasin ol i wok long lukim long ol muvi o piksa.

Sampela ol lain olsem NICTA, Dipatmen bilong Infomesen, Sensasip Bod, Australia Hai Komisin (DFAT) i bin kamap na toktok strong moa long daunim dispela pasin bilong yusim intanet na mobail fon long sampela we i no gutpela.

Planti toktok i kamap long we bilong stopim dispela pasin nogut we i save kamap long taim ol sumatin o manmeri save yusim intanet o mobail fon.

Rev. Joseph i tok ol Kristen famili i mas lainim ol pikinini bilong ol long yusim intanet o mobail fon long gutpela rot, na long dispela kain pasin em bai no inap bagarapim gutpela sidaun bilong ol famili.

Em i tok long dispela as sios i mekim aweanes long ol gavman na papamama i lukaut long pasin bilong yusim mobail fon.

“I gat gutpela na nogut samting i stap long intanet tasol olsem Kristen, sios i laikim yumi olgeta long bihainim stretpela rot.

“Bai yu no inap lukim planti pikinini go long sios tude, olsem na PNGCC bai bringim dispela aweanes i go long ol skul long toksave long nogut na gutpela bilong yusim intanet o mobail fon,” Rev. Joseph i tok.

Em i tokaut strong long gavman i mas painim sampela we long kontrolim dispela pasin nogut i save kamap long taim bilong yusim intanet o mobail fon.

PINIS.