MEMBA bilong Lae na Minista bilong graun, John Rosso i bin opim nupela kwaliti klasrum bilong Huonville Praimari Skul. Dispela klasrum em wanpela bilding we i gat 8-pela klasrum insait long en.

Huonviile Praimeri Skul i gat moa long 2000 sumatin na em i wanpela bilong ol bikpela skul long Lae siti. Bipo ol helt atoriti i bin pasim ol klasrum long dispela skul long no ken operet bikos ol i olpela na i no seif long ol sumatin i skul insait. Memba Rosso i lukim dispela hevi we skul i gat na em i putim han bilong em long helpim skul wantaim ol nupela klasrum. Long taim bilong opim klasrum, Memba Rosso i tokaut olsem em i mekim komitmen long helpim long sanapim wankain klasrum gen bilong skul sapos em i gat inap fand. Ol i mekim dispela klasrum wantaim stil na i kam wantaim olgeta materiel bilong ol tisa na ol sumatin. Bilding i gat spes  inap long moa long 400 sumatin wantaim ol opis bilong ol tisa. Dispela projek i kam aninit long Lae City Authority (LCA) aninit long lidasip bilong Siaman bilong LCA John Rosso. Long wankain taim, John Rosso i bin givim tupela nupela kar i go long distrik edukesen na distrik edministresin.