PORT Moresby General Hospital (POMGEN) i tok bikpela bel sori i go long ol famili bilong 4-pela pikinini husat i bin dai long haus sik. Sif Ekseketiv Opisa bilong POMGEN Dokta Paki Molumi i tok, “Wok bilong mipela ol wokmanmeri bilong haus sik em i bilong sevim laip bilong ol manmeri. Ol dokta na nes i save tok promis taim ol pinisim skul long helpim husat manmeri o pikinini i sik.

Wanem samting i bin kamap long Fonde 22 Ogas em i mekim mipela ol wokmanmeri long haus sik na ol famili i no pilim gut. Dokta Molumi i tok, “Mipela i no save wanem samting i kamap tasol wanpela wok painimaut tim i wok long mekim wok long painimaut wanem samting tru i bin kamap. Minista bilong Helt tu i  bai stap insait long tokaut long wanem samting i bin kamap taim ol wok painimaut tim i tokaut.  “POMGEN bai mekim sua dispela wok painimaut i kamap gut long soim bel sori bilong en long ol famili bilong 4-pela lain husat i dai,” Dokta Molumi i tok. Em i tok moa, “Ol manmeri husat i yusim sosel media i mas stop long mekim kainkain toktok long dispela samting i kamap. Yupela bai bagarapim tingting bilong ol famili bilong dispela 4 -pela lain na ol hatwok dokta na nes bilong POMGEN. Taim ol tim i tokim mipela wanem samting i bin kamap bai mipela i tokim ol famili na ol pablik tu.

Samantha Solomon i raitim