Tupela lain wanpisin long ol boda distrik long Enga i laik storngim wok bilong planim na lukautim kopi insait long provins na kantri.

TUPELA lain wanpisin long ol boda distrik long Enga i rejista wanpela kopi kopretiv sosaiti. Na ol i laik mekim wok bilong kopi neseri, planim na salim kopi long ples bilong ol.

Ol dispela tupela grup em, DepSkin Kopretiv Sosaiti bilong Wabag Open Ilektoret na Sikin wanpisin bilong Wapenamanda Open Ilektoret.

Ol tupela wanpisin i stap klostu long wanpela narapela long Ayel Veli na ol i serim boda.

Mausman bilong bilong DepSkin Kopretiv Sosaiti, Benny Wais i tok bai ol i opim DepSkin Kopretiv long Tunde 23 Me. Dokta Lino Tom wantaim ol opisa bilong Dipatmen bilong Komes na Indastri bai go stap long dispela impoten seremoni.

Wais i tok tu olsem ol i bin salim askim i go tu long Memba bilong Wapenamanda, Miki Kaeok long kam tu long dispela seremoni.

“Mipela i planim pinis 2,000 sidling na sanapim nupela neseri long saplai kopi sidling i go long Aiyel Veli,” Wais i tok.

Mista Wais i tok DepSkin Kopretiv Sosaiti bai givim fainensal sapot long ol pipel bilong Wapenamanda na Wabag long planim kopi na kisim gutpela benefit long taim ol i salim drai kopi bin long gutpela prais.

Prais bilong drai kopi bin nau em K8 long wanpela kilo na prais bilong kopi i wok long surik i go antap.

Wapenamanda distrik i winim ol arapela distrik long Enga long planim kopi. Kompiam i kamap namba tu na Wabag i namba tri.

PINIS.