EU-STREIT PNG Program i wok wantaim Mibank long givim rurel benking sevis long ol kakao, vanila na pis fama.

Ol fama bilong ples Sikan, Sir na Dandan long Wod 19, Turubu LLG long Wewak Distrik husat i memba bilong Sisida Kopretiv Sosaiti i kisim dispela sans long sevim mani bilong ol long lokal maikro benk. Ol fama i bin kisim ol MiCard bilong ol long wankain taim ol i opim ol akaun wantaim Mibank. Dispela i bin kamap long wanpela bung bilong ol fama taim ol i kamap long trening bilong badim kakao. Namel long ol dispela fama, i bin gat 20 yangpela meri, ol 15 yut na 20 ol lapun mama na 10-pela man. Olgeta i bin amamas tru long dispela sans i kamap long haus dua bilong ol. MiBank i sainim agrimen wantaim United Nations Capital Development Fund (UNCDF) bilong mekim ol fainensel wok insait long EU-STREIT PNG Program. Mibank i kamapim wanpela grup bilong ol fama long kamap ejen long ples Dandan. Taim Mibank i lonsim ejen bilong em pinis, ol fama bai ino ken go daun long taun long dipositim mani, nogat. Ol bai yusim ejen long ples bilong ol. Sisida Kopretiv Sosaiti bai kamap ejen we olgeta fama bai putim mani bilong ol o go rausim mani long ples. Long wankain taim tu ol i ken kisim top-ap long mobail fon bilong ol. Kakao prodaksen opisa bilong EU-STREIT, Michael Lames i tok em na ol fama i amamas tru long kisim dispela sans we Mibank i wanbel long rolim aut program wantaim ol. Kathlyn Amos, i gat 58 krismas na 4-pela pikinini na em i bin namba wan meri long opim akaun bilong em. Em i tok long opim akaun wantaim Mibank em isi tru. Em i tok ol i no askim em planti askim. Komyuniti  bilong Wod 29 long Turubu i gat 15,000 pipel na i no gat rot i go insait long ol ples. Ol i save trevol long wara tasol i go salim ol prodak bilong ol long maket o mekim benking sevis. Nau ol bai yusim tasol ol mobail fon bilong ol.